Í myndbandi sem Volodymyr Zelenskyy, Úkraínuforseti, sendi frá sér í gærkvöldi hvatti hann rússneska hermenn til að gefast upp og sagði að þeir eigi „von um að sleppa lifandi“ ef þeir gefast upp fyrir Úkraínumönnum.

„Fyrir hönd úkraínsku þjóðarinnar veitum við ykkur tækifæri til að lifa. Ef þú gefst upp fyrir hersveitum okkar verður farið með þig eins og fara á með fólk: með virðingu. Þannig er ekki farið með þig í hernum þínum og þannig fer herinn ykkar ekki með okkar fólk. Veljið.“

Sagði hann og bætti við að stríðið sé orðið „martröð“ fyrir rússneska herinn vegna mikils manntjóns og tjóns á hertólum.

Hann sagði einnig að friðarviðræðum verði haldið áfram í dag.