The Guardian skýrir frá þessu. Fram kemur að í gær hafi Jake Sullivan, þjóðaröryggisráðgjafi Bandaríkjastjórnar, fundað í Róm í sjö klukkustundir með Yang Jiechi, kínverska þjóðaröryggisráðgjafanum, um málið. Sullivan benti honum á að Rússar hafi ekki lagt mikið á sig til að leysa málið eftir diplómatískum leiðum áður en þeir réðust inn í Úkraínu, þeir hafi aðeins tekið þátt í sýndarviðræðum og að rússneski herinn sýni þess merki að hann sé ekki vel í stakk búinn til að standa í stríðsrekstri.
Bandaríska sendinefndin átti ekki von á að kínversku fulltrúarnir væru komnir til samningaviðræðna, heldur að þeir muni flytja skilaboð til valdhafa í Peking. Einn bandarískur embættismaður sagði að fundi loknum að hér hafi ekki verið um eiginlegan samningafund að ræða, heldur hafi verið skipst á skoðunum.
Þegar hann var spurður hvort fundurinn hefði skilað einhverjum árangri sagði hann að í því samhengi skipti líklega máli hvernig árangur er skilgreindur en það sé talið mikilvægt að halda samskiptalínum á milli Bandaríkjanna og Kína opnum, sérstaklega í málum þar sem ríkin greinir á.
Bandaríska sendinefndin yfirgaf fundinn svartsýn á að kínverska stjórnin muni hætta við að styðja Rússar í stríðinu. „Þeir hafa nú þegar ákveðið að veita efnahagslega og fjárhagslega aðstoð og lögðu áherslu á það í dag. Spurningin er í raun hvort þeir munu ganga lengra en það,“ sagði einn bandarísku embættismannanna.
Rússar eru sagðir hafa beðið Kínverja um vopnaða dróna og margar tegundir skotfæra. Þetta er þó ákveðnum vandkvæðum bundið að sögn bandarískra embættismanna því vopnakerfi ríkjanna eru ólík.
CNN sagði í gær að Rússar hefðu beðið Kínverja um matarpakka fyrir hermenn sína en það sýnir vel hversu mikinn vanda Rússar glíma við í birgðaflutningum til hersveita sinna.
Rússar hafa mikla þörf fyrir efnahagslega- og fjárhagslega aðstoð vegna þeirra hörðu refsiaðgerða sem Vesturlönd hafa beitt þá frá upphafi innrásarinnar. Hætt er við að til greiðslufalls ríkissjóðs komi á morgun þegar hann á að greiða af erlendum lánum.
Rússnesk yfirvöld hafa nær engan aðgang að gull- og gjaldeyrisforða sínum en eru með forða í kínverska gjaldmiðlinum yuan svo þau geta átt í viðskiptum við Kína.
Í bandaríska stjórnkerfinu ríkir svartsýni á að hægt verði að fá Kínverja ofan af því að styðja Rússa í stríðinu. Aðallega vegna þess að vinátta og samstarf ríkjanna er eitthvað sem Xi Jinping, Kínaforseti, leggur mikla áherslu á. The Guardian hefur eftir bandarískum embættismanni að neðar í kínverska stjórnkerfinu séu meiri efasemdir um þessa vináttu og samstarf. Xi og Pútín eigi sér þann sameiginlega draum að binda enda á yfirburði Bandaríkjanna á alþjóðasviðinu.
Ef Kínverjar styðja Rússa í stríðinu í Úkraínu og deilunum við Vesturlönd er næsta skref Joe Biden, Bandaríkjaforseta, og ríkisstjórnar hans að beina sjónum sínum að bandalagsríkjum Bandaríkjanna í Evrópu og fá þau til að endurskoða samband sitt við Kínverja.
