Sólveig Anna Jónsdóttir, nýkjörinn formaður Eflingar og Viðar Þorkelsson, fyrrum framkvæmdastjóri verkalýðsfélagsins, greina frá því í færslum á Facebook-síðum sínum að fráfarandi formaður Eflingar, Agnieszka Ewa Ziólkowska, hafi ásamt stjórn félagsins samþykkt að framkvæmd verði sérstök lögfræðiúttekt á kostnaðinum við vinnu vefstofunnar Sigurs og Andra Sigurðssonar við hin ýmsu miðlamál Eflingar og hönnun á nýrri þrítyngdri vefsíðu félagsins.
Eins og Fréttablaðið greindi frá á dögunum fékk Andri, sem er samherji Sólveigar Önnu í pólitík á vettvangi Sósíalistaflokksins, yfir 20 milljónir króna á þriggja ára tímabili fyrir vinnu sína á þeim tíma sem Sólveig Anna og Viðar fóru með völd í félaginu.
Skömmu síðar fullyrti Viðar að endurskoðunarfyrirtækið Deloitte, sem fer með endurskoðun ársreikninga Eflingar, hafi ekki gert neinar athugasemdir um kaupin á vinnuni við gerð vefsíðunnar og vísaði öllum dylgjum á bug.
Sitjandi stjórn Eflingar virðist þó ætla að taka málið lengra og fara bæði Sólveig Anna og Viðar hörðum orðum um ákvörðunina.
Sólveig Anna hefur ekki enn tekið við stjórnartaumum í félaginu þrátt fyrir að um mánuður sé liðinn frá afgerandi sigri lista hennar í formanns- og stjórnarkjöri Eflingar. Sólveiga Anna segir að í dag hafi átt í síðasta lagi, samkvæmt niðurstöðu trúnaðarráðs Eflingar, að halda aðalfund til að nýkjörin forysta gæti tekið við stjórn félagsins.
Þá niðurstöðu hafi hinsvegar Agnieszka og stjórnin virt að vettugi og þess í stað haldið aukastjórnarfund til þess að samþykkja áðurnefnda lögfræðiúttekt.
„Hún getur ekki virt niðurstöður kosninga félagsfólks um það hver eigi að stýra félaginu, hún getur ekki sætt sig við að hún og hennar fólk hafi tapað. Hún getur ekki virt grundvallarreglur lýðræðisins og viðurkennt tap; nei, þess í stað neitar hún að víkja úr formannsstól og notar síðustu vikurnar sem hún hefur gefið sjálfri sér við völd til að halda áfram að reyna að ata mig og samstarfsfólk mitt aur,“ skrifar Sólveig Anna.
Hún segist ekki undrast atburðarrásina en sé miður sín yfir þessu ástandi sem hún segir hörmulegt.
„Ég er miður mín yfir því að manneskju sem er alveg sama um venjur og hefðir félagsins, alveg sama um niðurstöður kosninga, alveg sama um allt nema að næra eigin hefnigirni hafi umboðslaus öll þau völd sem formaður sannarlega hefur og kjósi að beita þeim með svo frámunalega skammarlegum hætti,“ skrifar Sólveig Anna.
Viðar Þorsteinsson hafði áður ritað pistil þar sem hann sagði ákvörðun stjórnarinnar vera lið í áframhaldandi árásum á sig.
