Í kjölfar árásarinnar og sérstaklega þess hversu nálægt Póllandi herstöðin, sem hefur einnig verið notuð til æfinga af hermönnum frá NATO-ríkjunum, er hafa spurningar vaknað um hver viðbrögð NATO verða ef rússneskt flugskeyti lendir í Póllandi? Þá er verið að ræða um flugskeyti sem lendir þar fyrir slysni, ekki sé ætlunin að skjóta því á Pólland. Mun NATO bregðast við slíku og telja að um árás á eitt bandalagsríkið sé að ræða og svara í sömu mynt og hefja hernað í Úkraínu?
Volodymyr Zelenskyy, Úkraínuforseti, segir að taka þurfi þessa árás og stöðuna í heild mjög alvarlega. „Ef þið lokið ekki lofthelgi okkar er aðeins tímaspursmál um hvenær rússnesk flugskeyti lenda á ykkar yfirráðasvæði, á yfirráðasvæði NATO, á heimilum NATO-borgara,“ sagði hann í myndbandi sem hann sendi frá sér aðfaranótt mánudags.
Jens Stoltenberg, framkvæmdastjóri NATO, hefur lagt áherslu á að NATO sé varnarbandalag og muni ekki leita eftir því að lenda í stríði við Rússland. „Við höfum gert það ljóst að við munum ekki hefja hernað í Úkraínu, hvorki á jörðu né í lofti,“ sagði hann í síðustu viku eftir fund með utanríkisráðherrum NATO-ríkjanna.
Claus Mathiesen, lektor í rússnesku við danska varnarmálaskólann og sérfræðingur í hernaðarpólitík, sagði í samtali við dagblaðið Information að árásin á herstöðina væri enn ein stigmögnun átakanna. Enginn vafi sé á að ráðist hafi verið á herstöðina vegna tengsla hennar við NATO og þeirra æfinga sem hermenn frá NATO hafa stundað þar með úkraínska hernum. Þetta hafi verið leið Rússa til að segja að þeir vilji ekki sjá NATO í Úkraínu.
En hvernig mun NATO bregðast við ef rússneskt flugskeyti lendir í Póllandi? Peter Viggo Jakobsen, hjá danska varnarmálaskólanum, sagðist í samtali við Jótlandspóstinn ekki vera í neinum vafa um viðbrögðin: „Þá segir NATO: Þetta var óhapp. Við erum leiðir yfir því og þetta má ekki endurtaka sig. Við ætlum ekki að hefja þriðju heimsstyrjöldina af því að flugskeyti gerir holu í jörðina einhvers staðar í Póllandi.“
