Bardagakappinn Gunnar Nelson prýddi forsíðu helgarblaðs Fréttablaðsins sem kom út í dag. Í blaðinu má finna ítarlegt viðtal við Gunnar en þar ræðir hann meðal annars um komandi bardaga sinn við Japanann Takashi Sato.
Gunnar og Takashi munu mætast í hringnum í O2 höllinni í London þann 19. mars næstkomandi. „Það hefur liðið langur tími síðan að ég steig síðast inn í búrið og á þessum tíma hafa komið upp tækifæri sem hafa svo runnið mér úr greipum. Fyrir síðustu bardaga hef ég verið að glíma við smá meiðsli en núna er ég alveg hundrað prósent og er mjög spenntur fyrir því að fá tækifæri til þess að sanna mig á ný,“ segir Gunnar.
Í viðtalinu við Fréttablaðið ræðir Gunnar einnig ítarlega um það hvernig hlutirnir breyttust við það að eignast börn en hann er í dag tveggja barna faðir. „Þegar maður er byrjaður að stofna fjölskyldu breytist forgangsröðunin hjá manni,“ segir Gunnar.
Þá segir Gunnar að þegar börnin komu hafi hann ekki lengur verið í fyrsta sæti hjá sér sjálfum. „Sem væri í raun besti mögulegi farvegurinn þegar að maður er atvinnumaður í einhverju,“ segir hann.
„Sem atvinnumaður þarf maður að setja sig í fyrsta sæti en þegar það verður ónáttúrulegt fyrir manni þá verður það erfitt. Ég hef hins vegar alveg fundið mig í þessum aðstæðum sem faðir og fjölskyldumaður og kann miklu betur við þessar aðstæður sem ég er nú í. Maður elskar börnin sín meira en allt í lífinu. Hugur manns breytist, þú og það sem þú ert að gera er ekki lengur í fyrsta sæti.“
Gunnar segir að áður en börnin mættu í líf hans hafi hugur hans allur verið í íþróttinni. „Allan daginn var maður að spá í hinu og þessu henni tengdri,“ segir hann.
„Það var í rauninni ekkert sem ég skipulagði í mínu lífi annað en það hvenær og hvernig ég ætlaði að æfa næst, hvernig ég ætlaði að haga næstu mánuðum með tilliti til æfinga, hvort ég ætlaði að fara erlendis að æfa og hversu lengi ég ætlaði að vera þar. Það var ekkert sem stoppaði mig og ekkert annað sem ég þurfti að spá í nema sjálfan mig.“
Hann tekur fleiri dæmi um hvernig hlutirnir voru áður en hann varð faðir. Hann bendir til að mynda á að þá gat hann farið að sofa þegar hann vildi fara að sofa og hann gat vaknað þegar hann var ekki lengur þreyttur. „Allt svona breytist þegar að maður er orðinn faðir. Það er kannski erfitt til að byrja með þar sem maður er ekki vanur því en síðan mótast maður í þetta hlutverk. Maður verður bara þetta, faðir,“ segir hann.
Gunnar segir að börnin hafi þó breytt miklu í lífi hans til hins betra. „Maður lærir svo mikið af því að vera í þessu hlutverki og ég myndi ekki vilja hafa þetta öðruvísi,“ segir hann.
„Maður elskar börnin sín meira en allt í lífinu. Hugur manns breytist, þú og það sem þú ert að gera er ekki lengur í fyrsta sæti. Þegar það síast almennilega inn sættir maður sig við það hlutskipti. Mér finnst það rosalega gott, það er mjög eðlislægt fyrir mig.“
Þá segir hann að hann hafi verið orðinn þreyttur á sjálfum sér áður en hann eignaðist börn. „Ég var búinn að vera að spá í sjálfum mér og engum öðrum í öll þessi ár, þannig að það var bara hollt fyrir mig að verða faðir.“
