Konu sem fædd er árið 1985 hefur verið birt fyrirkall í Lögbirtingablaðinu þar sem ekki hefur náðst í hana til að birta henni dóm sem féll gegn henni í Héraðsdómi Reykjavíkur þann 16. desember síðastliðinn. Er ljóst að konan þarf bráðlega að fara að afplána dóm sinn en hún var dæmd í 17 mánaða fangelsi fyrir runu af skrautlegum afbrotum, samtals 22.

Samkvæmt ákæruliðunum hefur konan hvað eftir annað verið handtekin fyrir akstur undir áhrifum fíkniefna. Einnig hefur verið haldlagt hjá henni mikið magn fíkniefna sem hún hefur haft í fórum sínum, meðal annars kókaín, amfetamín og MDMA.

Þá var konan meðal annars sökuð um að hafa stolið bíl sem stóð á bílastæði í Reykjavík og keyrt hann í heimildarleysi. Var hún dæmd til að greiða eiganda bílsins 1,5 milljónir króna í skaðabætur.

Þá var hún sökuð um að hafa ekki skilað bíl eftir reynsluakstur hjá bílasölunni Gæðabílar í Garðabæ.

Ennfremur var konan sakfelld fyrir skjalafals, fyrir að hafa falsað umboð í nafni manns um að leysa út lyfseðilsskyld lyf hans. Var hún einnig sakfelld fyrir annað samskonar brot gegn öðrum manni.

Einnig var hún sakfelld fyrir að hafa stolið tveimur úlpum úr Icewear í Austurstræti fyrir samtals um 85 þúsund krónur. Einnig var hún sakfelld fyrir að hafa stolið vörum úr húsi í Hafnarfirði fyrir samtals 650 þúsund krónur. Var þar um að ræða Apple tölvu, Sonos hátalara, tölvutösku og IPC iðnaðarryksugu.

Konan játaði brot sín skýlaust sem virt var henni til refsilækkunar. Hins vegar á hún langan brotaferil að baki og var það henni til refsiþyngingar. Auk þess að fá 17 mánaða fangelsi og vera dæmd til greiðslu skaðabóta og málskostnaðar er konan svipt ökurétti ævilangt.