Samkvæmt heimildum DV er maður grunaður um að hafa brotið rúðu í húsi að Auðbrekku 4 í Kópavogi í nótt og kastað bensínsprengju inn í húsið.
Vísir.is greinir frá því að maður hafi verið handtekinn grunaður um íkveikjuna.
Húsið er á tveimur hæðum og voru fjórtán í húsinu er eldurinn kviknaði um þrjúleytið í nótt. Enginn meiðsl urðu á fólki en töluverðar skemmdir eftir reyk. Eldurinn var í einu herbergi.
DV náði sambandi við fyrrverandi eiganda hússins, Grétar Hannesson. Grétar segir að húsið hafi verið innréttað sem gistiheimili og lúti reglum um gistiheimili hvað varðar eldvarnir. Um herbergjaleigu er að ræða og íbúarnir eru allir erlendir. Þeir koma þó ekki frá einu fyrirtæki eða tiltekinni starfsmannaleigu heldur héðan og þaðan.
Grétar seldi húsið í janúar síðastliðnum til fyrirtækisins Húsheild. Forsvarsmaður þess er Ólafur Ragnarsson. Hann staðfestir að íbúarnir séu erlendir og komi hver úr sinni áttinni. Ólafur veit ekki meira um málið en það að maður er grunaður um íkveikju. Segist hann fá nánari upplýsingar frá lögreglu um málið síðar í dag.
Eftirfarandi tilkynning um málið hefur borist frá Lögreglunni á höfuðborgarsvæðinu:
„Rannsókn Lögreglunnar á höfuðborgarsvæðinu á bruna í húsi við Auðbrekku í Kópavogi er á frumstigi. Tilkynning um eldinn barst á fjórða tímanum í nótt, en í húsinu eru herbergi í útleigu. Engan sakaði. Tæknideild lögreglu kom á vettvang í nótt og heldur vinnu hennar þar áfram í dag.
Ekki er hægt að veita frekari upplýsingar að svo stöddu.“
