Albert Jónsson, fyrrverandi sendiherra, telur að Rússar muni ná hernaðarlegum takmörkum sínum í Úkraínu þrátt fyrir umræðu undanfarið um að hernaðurinn gangi illa og Úkraínumenn veiti meiri mótspyrnu en búist var við.

Rætt var við Albert í Kastljósi í kvöld.

Albert segir að löng liðsflutningalest sé á leið til Kænurgarðs úr norðri og yfir henni vaki rússneski flugherinn en það sé lykilatriði að Rússar hafi yfirráð í lofti.

Ennfremur séu Rússar að króa af þann hluta úkraínska hersins sem er í austurhluta landsins og girða fyrir að hann geti ráðist á rússneska herinn sem er byrjaður að umkringja Kænugarð.

Albert telur nær öruggt að Rússa muni vinna hernaðarlegan sigur. Efnhagslegar þvinganir Vesturveldanna gegn Rússum séu farnar að bíta mjög en ekki sé hægt að einangra Rússa að fullu viðskiptalega enda geti þeir alltaf snúið viðskiptum sínum til Kína og Indlands.

Albert segir að markmið Rússa sé ekki að hernema Úkraínu en markmiðið sé að ná yfirráðum í Kænugarði og víðar sem muni takast. Albert segir að Vesturveldin muni ekki flytja vopn til Úkraínumanna því það feli í sér beina þátttöku í stríðinu. Vopn verði líklega flutt til Póllands þaðan sem Úkraínumenn reyni að koma þeim inn í landið en erfitt sé að koma vopnum í réttar hendur á réttum stað og réttum tíma.

Albert segir að Úkraína tengist ekki grundvallaþjóðaröryggishagsmunum Bandaríkjanna og landið sé á áhrifasvæði Rússlands, sem er kjarnorkuvopnaveldi. Þess vegna standi Úkraínumenn hernaðarlega einir.

Albert telur ólíklegt að Rússar muni reyna að hernema Eystrasaltsríkin í kjölfarið. Þeir eigi fullt í fangi með Úkraínu og stefni ekki á frekari landvinninga.