Forseti Rússlands, Vladimir Pútín, hefur nú uppnefnt Vesturlöndin „lygaveldið“ [e. the empire of lies] og virðist ekki á allt sáttur við þær efnahagsþvinganir sem nú er beint gegn landi hans vegna innrásar Rússa í Úkraínu.

Pútín mun hafa sagt þetta í samtali við forsætisráðherra sinn, Mikhail Mishustin og aðra háttsetta embættismenn í ríkisstjórn hans.

Samkvæmt eftirriti af þessu samtali mun Pútín hafa sagt:

„[Mishustin] og ég ræddum um þetta, eðlilega með efnahagsþvinganirnar í huga sem þessi svokölluðu Vesturlönd – eða eins og ég kallaði þau í ræðu minni „lygavaldið“ – eru nú að reyna að beita gegn landi okkar.“

Opinbera vefsíða forsetaembættisins, Kremlin, greindi frá því fyrr í dag að Rússlandi geti bætt upp þann skaða sem þvinganirnar eru að valda. Talsmaður Kremlin, Dmitry Peskov sagði í samtali við blaðamenn: „efnahagsstaðan hefur breyst til muna, við getum orðað það þannig,“ og bætti við að Rússlandi hafi þegar gripið til ráðstafana til að bregðast við því.

„Rússland hefur kerfisbundið undirbúið sig undir mögulegar þvinganir í töluvert langan tíma, þeirra á meðal þær þyngstu þvinganir sem við erum nú að horfast í augu við.“

Gjaldmiðill Rússlands, Rúblan, hefur hrunið undanfarna daga eða niður um 20 prósent ef borin saman við dollarann. Seðlabankinn í Rússlandi hefur rúmlega tvöfaldað stýrivexti sína til að bregðast við stöðunni, en stýrivextir munu nú vera um 20 prósent samkvæmt The Moscow Times.

Hlutabréfa markaðurinn í Rússlandi er lokaður í dag.

Aðspurður hvort að yfirmenn hersins væru sáttir með árangur rússneska hersins í Úkraínu hingað til svaraði Peskov: „Ég hugsa að það sé ótímabært að tala um útkomu aðgerðanna eða hversu skilvirkar þær eru. Þið verðið bara að bíða þar til þessu er lokið.“

Fjöldi landa hefur lokað á flugumferð frá Rússlandi og rússneskra flugfara. Rússland hefur nú brugðist við því með því að loka lofthelgi sinni fyrir 27 ríkjum, þeirra á meðal Ísland.

Löndin eru: Austurríki, Albanía, Angvilla, Belgía, Bresku Jómfrúareyjurnar, Ungverjaland, Gíbraltar, Grikkland, Danmörk, Grænland, Færeyjar, Jersey, Írland, Íslands, Spánn, Kanada, Kýpur, Lúxemborg, Malta, Holland, Noregur, Portúgal, Finnland, Króatía og Svíþjóð.