Fleiri en 50 þúsund manns hafa nú flúið stríðsátökin í Úkraínu. Þetta segir framkvæmdastjóri flóttamannastofnunar Sameinuðu þjóðanna í gær. Segir hann jafnframt að um eitt hundrað þúsund séu nú á vergangi og að þeim muni fjölga stórkostlega á næstu dögum.

Pólska landamæraeftirlitið hefur þá greint frá því að um 29 þúsund manns hafi komið að landamærunum Póllands og Úkraínu á fimmtudag og mun fleiri en það á föstudag. Allt að tólf klukkustunda bið tók þar við flóttamönnunum sem sumir hverjir gengu tugi kílómetra. Þá höfðu í gær 26 þúsund flúið yfir til Moldóvíu og um 10 þúsund til Rúmeníu.

Á móti flóttamönnunum á pólsku landamærunum tóku bílalestir pólska hersins sem hafa verið að keyra vopn og skotfæri að landamærunum fyrir úkraínskar hersveitir sem há nú baráttu gegn innrásarher Rússa. „Við styðjum Úkraínumenn og fordæmum árásir Rússa,“ sagði pólski varnarmálaráðherrann Mariusz Blaszczak í gær. Á vegi flóttamanna urðu einnig fámennir hópar úkraínskra karlmanna sem eru á leið heim til að taka þátt í vörnum landsins. Ein milljón úkraínumanna býr í Póllandi.

Þá hafa einnig borist fregnir af fólki á leið til Úkraínu þar sem þau ætla að freista þess að ná ættingjum, vinum eða vandamönnum úr landinu.

Talið er að allt að fimm milljón Úkraínubúa gætu farið yfir til nágrannaríkja sinna á næstunni. Til samanburðar nefnir New York Times í frétt sinni um málið að Evrópa hafi tekið á móti einni og hálfri milljón flóttamanna í flóttamannakrísunni 2015.

Sá munur er þó á stöðunni þá og nú er að almenningur virðist reiðbúnari en áður til þess að leggja sitt af mörkum. Flóttamennirnir sem flúðu átök í Miðausturlöndum 2015 komu víða að luktum dyrum í Evrópu, en undanfarna daga hafa þúsundir almennra borgara staðið vaktina við landamærin og tekið á móti úkraínskum konum og börnum með teppi, heita drykki og faðmlög. Þá er lagaleg staða Úkraínumanna einfaldari en flóttamanna frá miðausturlöndum, þar sem þeim er heimil innganga í Evrópusambandslönd án vegabréfsáritunar.

Þá hafa greinendur jafnframt nefnt að bitur reynsla ríkja í Austur Evrópu af ofbeldi og kúgunartilburðum yfirvalda í Kremlin kunni að auka vilja almennings til þess að taka á móti flóttamönnum frá Úkraínu.