Fréttablaðið skýrir frá þessu í dag. Hefur blaðið eftir Oddi Árnasyni, yfirlögregluþjóni á Suðurlandi, að vatnið sé ísilagt núna og ekki verði reynt að ná flugvélinni næstu daga eða vikur. „Við hættum við aðgerðir út af ís og við erum ekki að fara í þá stöðu aftur,“ sagði hann.
Í gær var fundað um framhald aðgerða en nokkuð ljóst þykir að ekki sé hægt að fara í þær fyrr en hlýnar í veðri.
Fréttablaðið segist hafa heimildir fyrir að þegar líkin voru sótt á botn vatnsins hafi persónulegir munir fylgt þeim og muni þeir nýtast við rannsóknina.
Lögreglan er með upptökur úr öryggismyndavélum við Þingvallavatn í sinni vörslu en Oddur sagðist ekki veita upplýsingar um einstaka þætti rannsóknarinnar og af þeim sökum verði ekki sagt frá innihaldi myndefnisins að svo stöddu til að hafa ekki áhrif á framburð hugsanlegra vitna.
Hann sagði að mánuðir geti liðið þar til niðurstöður krufninga liggja fyrir en að þeim loknum fá aðstandendur líkin afhent til greftrunar en biðin eftir niðurstöðunum mun ekki tefja afhendinguna.
