Stjórn HSÍ mun setjast niður með Guðmundi Guðmundssyni, þjálfara karlalandsliðsins í handbolta, í næstu viku og ræða möguleika á áframhaldandi ráðningu en samningur Guðmundar við HSÍ rennur út í júní næstkomandi. Þetta staðfestir Guðmundur B. Ólafsson, formaður HSÍ, í samtali við DV.

Guðmundur hefur undanfarið brugðist við spurningum um framtíð hans í starfinu með þeim hætti að hann viti ekki neitt, HSÍ hafi ekki rætt við hann og hann viti ekki um hug stjórnarinnar til þess möguleika að hann stýri liðinu áfram. Flestir telja árangur liðsins á EM í Ungverjalandi og Slóveníu hafa verið framar vonum en liðið hafnaði í sjötta sæti, þó að stór hluti hópsins væri úr leik vegna Covid-smita. Árangur liðsins undanfarin ár hefur hins vegar verið slakur og á HM í fyrra var Guðmundur gagnrýndur fyrir að bregðast illa við pressu.

„Mótið er bara nýbúið og menn setjast niður með Guðmundi í næstu viku, fara yfir mótið og stöðuna og framtíðina,“ segir formaðurinn og nafni þjálfarans, Guðmundur B. Ólafsson. „Við erum ekki búnir að negla niður dag, hann var með Covid og var að losna úr því,“ segir Guðmundur B. enn fremur.

Varðandi það hvort aðrir kostir varðandi landsliðsþjálfarastöðuna séu uppi á borðinu segir Guðmundur B.: „Við byrjum á að ræða við hann og það er ekki verið að skoða neitt annað.“

Aðspurður um hvort einhverjar raddir væru innan stjórnarinnar sem væru andsnúnar Guðmundi segir hann: „Það er engin diskúsjón um það.“