Rauð veðurviðvörun er í gildi fyrir höfuðborgarsvæðið og vesturland fyrir seinni part nætur og snemmmorgun. Suðaustan rok eða ofsaveður verður frá kl. 4 í nótt til 8 í fyrramálið. Veðrið gengur þá nokkuð hratt niður en það mun snjóa eftir það. Snjór og/eða rigning verða á meðan versta veðrið gengur yfir. Er spáð ófærð og að erfitt verði að komast á milli hverfa.
Spáð er suðaustan 23-30 m/s með snjókomu og skafrenningi en slyddu næst sjávarsíðunni þegar versta veðrið gengur yfir. Hvassast í efri byggðum höfuðborgarsvæðisins og á Kjalarnesi.
Miklar líkur eru taldar á foktjóni og ráðleggur lögreglan á höfuðborgarsvæðinu fólki að ganga vel frá lausum munum. Verktökum er bent á að ganga vel frá framkvæmdasvæðum.
Suðaustanstormur og hríð með 15-23 m/s verða frá sirka hálftvö í nótt til fjögur en þá tekur við aftakaveðrið sem lýst var hér að framan.
Appelsínugul viðvörun gildir fyrir afganginn af landinu, fyrir utan höfuðborgarsvæðið og vesturland. Verður víða hvasst og mikil snjókoma um allt land. Hiti verður nálægt frostmarki.
Vinnuveitendur hafa margir sent þau skilaboð á starfsfólk að halda heima fyrir ef ófærð er og mæta ekki til vinnu fyrr en eftir hádegi. Stefnir í það mikla snjókomu að umferðaröngþveiti er óhjákvæmilegt ef umferð verður með sama móti og á venjulegum mánudagsmorgni.
Öllum morgunferðum hjá Strætó á höfuðborgarsvæðinu og á landsbyggðinni verður aflýst í fyrramálið. Má búast við því að akstur strætisvagna á höfuðborgarsvæðinu geti hafist að nýju í fyrsta lagi í um kl. 10.
