Flugvélin sem saknað hafði verið frá því um hádegi á fimmtudag fannst á ellefta tímanum í gærkvöldi.

Vélin fannst með aðstoð fjarstýrðs kafbáts fyrirtækisins Teledyne Gavia í Ölfusvatnsvík og fannst í sunnanverðu Þingvallavatni. Þetta kemur fram í tilkynningu frá Landhelgisgæslunni.

Þar segir:

„Rúmlega þúsund viðbragðsaðilar hafa tekið þátt í leitinni, þar á meðan á níunda hundrað björgunarsveitarmenn frá Slysavarnafélaginu Landsbjörg, þyrlusveit landhelgisgæslunnar, lögregla, séraðgerðasveit Landhelgisgæslunnar, almannavarnadeild ríkislögreglustjóra, sérsveit ríkislögreglustjóra, starfsmenn Isavia, einkaaðilar auk fjölmargra annarra. Landhelgisgæslan vill þakka öllum þeim sem komið hafa að þessari umfangsmiklu leit fyrir óeigingjarnt og fórnfúst starf við krefjandi aðstæður. Rannsókn málsins og næstu skref eru í höndum lögreglunnar á Suðurlandi.

Viðbragðsaðilar sem unnið hafa að leitinni eru komnir í hvíld og í hádeginu er fyrirhugaður stöðufundur þar sem farið verður yfir næstu skref. Lögreglan á Suðurlandi getur veitt frekari upplýsingar að þeim fundi loknum.“

Um borð í vélinni var flugmaðurinn, Haraldur Diego, ásamt þremur erlendum ferðamönnum, en þau héldu af stað fyrir hádegi á fimmtudag í útsýnisflug. Haraldur er reynslumikill flugmaður og ljósmyndari.

Áhyggjur vöknuðu þegar vélin skilaði sér ekki til baka á tilætluðum tíma og hófst í kjölfarið umfangsmikil leit, en jafnvel er tali að um fjölmennustu leitaraðgerðir Íslandssögunnar hafi verið að ræða.