Stefán Már Gunnlaugsson, varabæjarfulltrúi Samfylkingarinnar í Hafnarfirði, er allt annað en sáttur með Rósu Guðbjartsdóttur, bæjarstjóra Hafnarfjarðar, en hann segir að hún sé á villigötum í pistli sem birtist á Vísi í dag.
„Sjálfstæðisflokkurinn og bæjarstjórinn í Hafnarfirði eru á flótta frá eigin aðgerðarleysi í uppbyggingu íbúðarhúsnæðis og kenna öllum öðrum um nema sér sjálfum,“ segir Stefán í upphafi pistilsins.
Þá ræðir Stefán um hægan vöxt íbúa í bæjarfélaginu en árið 2020 fækkaði íbúum þess í fyrsta skipti, í fyrra fjölgaði þeim aðeins en þó aðeins um nokkra tugi. „Það er langt á eftir áætlunum bæjarins sem gera ráð fyrir að íbúum fjölgi um 334-1260 á ári,“ segir hann.
„Helsta ástæða tafanna að mati bæjarstjóra er að framkæmdarleyfi vegna rafmagnslínu sem lá yfir uppbyggingarsvæðin hafi verið kært og fellt úr gildi samkvæmt úrskurðarnefnd umhverfis- og auðlindamála. Hér er bæjarstjóri að setja út á lýðræðislegan rétt íbúanna til að láta sig varða umhverfi sitt og stuðla að náttúruvernd. Ljóst er að hér hefði mátt vanda betur til verka og koma í veg fyrir tafir með því að setja rafmagnslínurnar í jörðu eins og við í Samfylkingunni lögðum til. Þá er ekki hægt að útskýra tafir á uppbyggingu í Skarðshlíð með rafmagnslínum. Það hverfi var tilbúið til úthlutunar árið 2008.“
Í viðtali Viðskiptablaðsins við Rósu segir að rekja megi fólksfækkunina í bæjarfélaginu til þess að erlent vinnuafl hafi flust af landi brott. „Það stenst enga skoðun,“ segir Stefán um það.
„Því á sama tíma fjölgar íbúum í nágrannasveitarfélögunum umtalsvert. Samkvæmt talningu Samtaka iðnaðarins á íbúðum í byggingu hefur um langt árabil verið minnst byggt í Hafnarfirði. Íbúar og einkum ungt fólk er því ekki að finna húsnæði í Hafnarfirði og flytur úr bænum.“
Hann segir að skipulag og þéttingaráform fyrir hverfið Hraun-vestur hafi legið fyrir í langan tíma en þó sé fátt að gerast þar. „Engin uppbygging hafin. Önnur þéttingaráform hafa velkst til í kerfinu. Það var ekki fyrr en við í Samfylkingunni þrýstum stöðugt á um að ganga til verka að meirihluti Sjálfstæðis- og Framsóknarflokks rumskuðu og eitthvað fór að gerast,“ segir hann.
Að lokum skýtur Stefán fast á bæjarstjórann og flokk hennar, Sjálfstæðisflokkinn. „Það er auðveldara að kenna öðrum um en að líta í eigin barm. Einnig að tala um allar íbúðirnar sem á eftir að byggja í framtíðinni og ylja sér við óskhyggju,“ segir hann.
„Ljóst er að Sjálfstæðisflokkurinn sem hefur haft uppbyggingarmálin á sinni könnu undanfarin tæp átta ár hefur skort alla forystu og framtíðarsýn. Hér þarf að gera betur. Láta verkin tala. Það gerðu jafnaðarmenn við stjórn bæjarins og nú þarf að hefja nýja sókn i bænum undir forystu Samfylkingarinnar“
