Lögreglan var kölluð til í Kringluna í dag vegna grímuklæddra mótmælenda sem fjölmennt höfðu í verslunarmiðstöðina til að mótmæla sóttvarnaraðgerðum yfirvalda. Fjölmiðlum barst tilkynning um fyrirhuguð mótmæli í nafnlausri fréttatilkynningu um hádegisbilið þar sem fram kom að um væri að ræða hópgjörning gegn ofríki, harðstjórn, einræði, þöggun og spillingu.
Starfsmenn Kringlunnar óskuðu eftir því að mótmælendur yrðu fjarlægðir og varð lögreglan við þeirri beiðni. „Kringlan ræður því hverjir eru þarna inni, þeir óskuðu eftir því að þeir yrðu fjarlægðir og við urðum við þeirri ósk,“ segir vakthafandi lögreglumaður í samtali við Vísi.
Mótmælin vöktu nokkra athygli Kringlugesta og má finna nokkur myndbönd af þeim, meðal annars á samfélagsmiðlinum TikTok.
@the.furrys1 Fólk í kringluni 🥺. #foryou #fyp #foryoupage ♬ Baby – Justin Bieber
Í hinni frægu sögu og bíómynd V for Vendetta, voru fleyg orð látin falla: „Fólkið á ekki að óttast ríkið. Ríkið á að óttast fólkið.“ Með þessu er átt, að fólkið í landinu á valdið og veitir ríkinu aðeins afnot af því valdi. Fólkið getur alltaf tekið valdið til baka, ef ríkið misnotar þetta vald. Einnig vísa þessi orð til þess að fólk á alltaf rétt á að koma saman og mótmæla á friðsælan hátt og ætti í raun að hvetja til þess.
Við viljum ekki að yfirvöld taki allar ákvarðanir fyrir okkur. Við viljum halda þeim rétti sem okkur er gefinn við fæðingu, rétti yfir eigin líkama og frelsi til að taka ákvarðanir varðandi eigið líf. Sagan hefur sýnt okkur hversu nauðsynlegt það er að veita ríkisvaldi stöðugt aðhald. Borgaraleg óhlýðni er því ekki aðeins mikilvæg heldur nauðsynleg.
Gríman í V for Vendetta er táknmynd friðsælla mótmæla gegn ofríki, harðstjórn, einræði, þöggun og spillingu. Gríman táknar einnig samstöðu almennings. Gríman veitir nafnleysi og þar með öryggi til að mótmæla burtséð frá stétt eða stöðu og tækifæri til að standa saman sem heild.
Valdið er aldrei ríkisins, það er alltaf einstaklingsins. Þegar hið opinbera hefur ítrekað tekið sér aukið vald yfir lífi og heilsu borgarans, erum við komin á hálan ís. Við verðum að sjá til þess að stjórnvöld gefi allt það vald sem við lánuðum þeim á meðan faraldrinum stóð til baka. Nú þegar stjórnvöld hafa gefið út aðgerðaráætlun til afléttingar sóttvarnaaðgerða, er mikilvægt að staldra við og horfa yfir farinn veg. Stórar spurningar sitja nefnilega eftir, þótt veiran sé að mestu yfirbuguð.
Hvenær var almenningi gefinn kostur á að taka þátt í ákvörðunum um sóttvarnir? Hvar var hið lýðræðislega ferli í upphafi og hvar er ábyrgðin núna? Hvað með pallborðsumræður, þar sem allar hliðar og valkostir eru metin af óháðum aðilum? Hvað réttlætti það að þagga niður í fólki sem hafði ólíkar skoðanir eða benti á önnur sjónarmið en stjórnvöld höfðu? Hvers vegna var ofuráhersla á bólusetningar, frekar en að benda á leiðir til að efla ónæmiskerfið eins og upptöku vítamína?
Þöggunin er ærandi þegar kemur að umræðu um sóttvarnir og veirufaraldurinn. Tjáningarfrelsið sem manneskjan hefur stanslaust þurft að berjast fyrir er fokið út um gluggann og nú má aðeins ákveðin skoðun heyrast. Jafnvel hámenntuðum læknum, veirufræðingum og allskonar vísindamönnum er úthýst úr umræðunni. Það er lokað á þá á mörgum netmiðlum, þeir fá enga sanngjarna birtingu í öðrum fjölmiðlum og allt er gert til að sverta mannorð þeirra.
Ákvarðanir teknar í ótta eru aldrei heillavænlegar. Ótti getur alið á andúð gagnvart einhverjum óljósum óvini. Eru óbólusettir rót alls ills? Eða vantar okkur bara sökudólg til að kenna um ástandið þegar þrjár sprautur virka ekki? Að ráðið sem átti að bjarga mannkyninu frá vírusinum gerði það ekki.
Byggjum nýtt samfélag á umhyggju í stað ótta. Finnum eitthvað sem sameinar okkur í stað þess að sundra. Við viljum búa í samfélagi sem hýsir ólíkar skoðanir og viðhorf, og öll litbrigði mannlífsins.
