Samkvæmt niðurstöðu úttektar Sjúkratrygginga Íslands á Heilsustofnuninni í Hveragerði hafa tæplega 600 milljónir króna verið teknar út úr stofnuninni með ólögmætum hætti og kostnaðnum velt yfir á sjúklinga. Kjarninn greinir frá þessu.
Samningur Heilsustofnunarinnar við Sjúkratryggingar, sem tryggir henni tæpan milljarð króna árlega úr ríkissjóði rennur út í mars en gerðar hafa verið kröfur um úrbætur. Heilsustofnunin hafnar niðurstöðu úttektarinnar. Sjá viðbót neðst í frétt frá kl. 13.22.
Í frétt Kjarnans segir að þessar tæpu 600 milljónir hafi verið teknar út úr félaginu á 15 ára tímabili. „Þetta var gert með því að Náttúrulækningafélagið tók einhliða ákvörðun um að hækka arðgreiðslur til sín án aðkomu Sjúkratrygginga Íslands og heilbrigðisráðuneytisins, en Heilsustofnunin fær tæpan milljarða króna úr ríkissjóði á ári,“ segir í Kjarnanum.
Þá hafi rekstrarfé Heilsustofnunarinnar verið nýtt til „heilsutengdrar ferðaþjónustu“ sem er ekki hluti af samningum hennar við Sjúkratryggingar og hún látin greiða afborganir af lánum sem eru þinglýstar í eigu Náttúrulækningafélagsins ásamt því að bera allan viðhalds- og rekstrarkostnað af fasteignunum.
Heilsustofnunin er í eigu Náttúrulækningafélags Íslands. Forseti þess félags, og ennfremur stjórnarformaður Heilsustofnunarinnar, er Gunnlaugur K. Jónsson, sem einnig hefur starfað sem yfirlögregluþjónn hjá lögreglunni á höfuðborgarsvæðinu. Varaforseti Náttúrulækningafélagsins er Geir Jón Þórisson, fyrrverandi varaþingmaður Sjálfstæðisflokksins og fyrrverandi yfirlögregluþjónn. Hann er varamaður í stjórn Heilsustofnunarinnar.
„Báðir þessir aðilar eru skráð félagasamtök og skila því ekki ársreikningum til Skattsins líkt og flestir rekstraraðilar þurfa að gera. Þá er afar óvenjulegt að félagasamtök eigi önnur félagasamtök,“ segir í frétt Kjarnans sem má lesa í heild sinni með því að smella hér.
Viðbót klukkan 13.19:
DV hefur borist eftirfarandi yfirlýsing frá Þóri Haraldssyni, forstjóra Heilsustofnunar NLFÍ.
Góðan daginn.
Þar sem í fréttum ykkar kom fram umfjöllun um Heilsustofnun sem byggð er á frétt í Kjarnanum í morgun, vil ég upplýsa að eftirfarandi yfirlýsing var send til Kjarnans fyrir skömmu:
Sæll Þórður,
Ég vil byrja á að benda á að úttekt Sjúkratrygginga á málefnum Heilsustofnunarinnar er ekki lokið, öfugt við það sem segir í frétt Kjarnans. Staðfesti deildarstjóri eftirlitsdeildar SÍ í tölvupósti til okkar að svar Heilsustofnunar frá í janúar verði metið sem andmæli við bréfi SÍ frá í desember. Við lítum því svo á að úttektinni sé ekki lokið og að enn eigi eftir að taka tillit til andmæla okkar.
Í fréttinni er því slegið upp að „um 600 milljónir króna hafi verið teknar ólöglega út úr Heilsustofnun“. Þetta er rangt. Staðreyndin er sú að hver einasta króna af framlagi ríkisins til Heilsustofnunar hefur farið til að veita þjónustu til sjúklinga í samræmi við þjónustusamning stofnunarinnar við Sjúkratryggingar Íslands.
Greiðslur til eigandans, Náttúrulækningafélags Íslands, eru í samræmi við samning sem gerður var við Heilbrigðisráðherra árið 1991 þegar Heilsustofnun var sett á laggirnar og hafa þær greiðslur alltaf legið fyrir þegar samningar við SÍ hafa verið endurnýjaðir.
Heilsustofnun hefur ekkert að fela. Við höfum sent Sjúkratryggingum, og áður heilbrigðisráðuneytinu ársreikninga, skýrslur og niðurstöður árangursmælinga og fengið lof þeirra fyrir góð og skilvirk skil. Þá hefur Ríkisendurskoðun fengið ársreikninga stofnunarinnar. Allar okkar bækur eru opnar fyrir Sjúkratryggingar og Ríkisendurskoðun, öllum fyrirspurnum hefur verið svarað og engar athugasemdir hafa verið gerðar, – aldrei, hvorki við faglega þjónustu né fjármál.
Nú á haustdögum höfum við verið í bréfaskiptum við nýstofnaða eftirlitsdeild Sjúkratrygginga þar sem ljóst er að forstöðumaður þeirrar deildar hefur ekki haft nægilega þekkingu á samningum og samskiptum Heilsustofnunar og Sjúkratrygginga. Meðal annars hefur þetta snúist um efnisatriði samninga við Heilbrigðisráðuneytið frá 1991, þegar Heilsustofnun var stofnuð, og virðist eftirlitsdeildin halda fram að það samkomulag sem þá var gert hafi ekkert gildi og sé marklaust.
Stóra fréttin í málinu er í raun sú að sjúklingar Heilsustofnunar hafa með sérdaggjöldum greitt um 300 milljónir króna síðustu 5 ár til að kosta meðferðarstarf af því að framlög Sjúkratrygginga hafa ekki einu sinni nægt fyrir meðferðarkostnaði.
Sérdaggjöld eru innheimt þar sem framlög ríkisins nægja ekki fyrir meðferðarkostnaði, hvað þá gistingu eða fæði og það er í fullu samræmi við samning SÍ og Heilsustofnunar.
Til að fá niðurstöðu í málin og ljúka því óskaði Heilsustofnun í gær eftir fundi með Sjúkratryggingum um þær kröfur sem eftirlitsdeildin hefur sett fram og hvort Sjúkratryggingar fari fram á einhverja breytingu á kröfum til Heilsustofnunar.
Kveðja,
Þórir Haraldsson
Stjórnarformaður Heilsuhælisins með 1,2 milljónir á mánuði – Forstjórinn látinn hætta fyrirvaralaust
