Ellefu mánaða gömul ákæra héraðssaksóknara gegn karlmanni fyrir kynferðisbrot gegn barni og vopnalagabrot verður senn tekin fyrir af dómstólum. Brotin eru sögð hafa átt sér stað aðfaranótt laugardagsins 12. október 2019, en ákæra í málinu var gefin út í febrúar á síðasta ári.

Í ákærunni, sem DV hefur undir höndum, er maðurinn sagður hafa í tvígang farið með hönd undir teppi sem 13 ára stúlka hafði yfir sér og strokið henni um læri og rass. Stúlkan var gestur á heimili ákærða þar sem hún gisti í sófanum í stofu íbúðar mannsins.

Þá greinir frá því í ákæru að lögregla hafi þetta sama kvöld fundið Savage Mark II riffil og skotfæri í þann riffil í opnum skáp í ólæstu svefnherbergi, og er maðurinn vegna þess ákærður fyrir vopnalagabrot. Í vopnalögum segir að geyma eigi skotvopn og skotfæri í aðskildum læstum hirslum. Þá segir jafnframt í lögunum að ráðherra megi setja strangari reglur og skilyrði um geymslu skotvopna þegar tilteknum fjölda skotvopna er náð. Sú reglugerð skyldar þá byssueigendur sem eiga fjögur skotvopn eða fleiri til þess að hafa læstan byssuskáp að tiltekinni gerð, veggfastan með tilteknum hætti, undir skotvopn sín.

Algengt virðist vera að eigendur skotvopna telji sig ekki þurfa að geyma vopnin sín í læstum hirslum nema þá að eiga fjórar byssur eða fleiri. Þann útbreidda misskilning hefur lögreglan ítrekað reynt að leiðrétta.

Brotaþoli í málinu gerir kröfu um að maðurinn greiði sér 600 þúsund krónur í miskabætur. Saksóknarar í málinu krefjast þess að maðurinn verði dæmdur til refsingar og til greiðslu alls sakarkostnaðar sem af málinu hlýst.

Málið verður tekið til aðalmeðferðar þann 10. janúar næstkomandi í Héraðsdómi Reykjavíkur.