Jóhann Pétur Harðarson hefur verið ráðinn lögfræðingur flugfélagsins PLAY og mun hann bera ábyrgð á greiningu og úrlausn lögfræðilegra álitamála og sinna ráðgjöf sem og upplýsingagjöf til stjórnenda og stoðsviða. Hann verður jafnframt regluvörður félagsins.

Jóhann hóf störf í júlí. Í tilkynningu frá Play kemur fram að Jóhann Pétur hefur víðtæka alþjóðlega reynslu úr atvinnulífi og hefur starfað í Bandaríkjunum, Ástralíu og Evrópu.

„Nú síðast starfaði Jóhann Pétur í Ástralíu við ráðgjöf til frumkvöðla. Þar áður var hann starfsmaður í fyrirtækjaráðgjöf Arctica Finance.“

Jóhann segir spennandi að vera genginn til liðs við PLAY en haft er eftir honum í tilkynningu að fyrstu vikurnar hafi verið einstaklega ánægjulegar.

„Ég er afar ánægður að vera orðinn starfsmaður PLAY og það er spennandi tækifæri að taka þátt í markvissri uppbyggingu félagsins. PLAY nýtur góðs af reynslu starfsmanna og skýrri stefnu stjórnenda og hefur meðbyr á óvissutímum. Fyrstu vikurnar hafa verið einstaklega ánægjulegar í nýju starfi“

Birgir Jónsson, forstjóri PLAY, segist stoltur af því að fá Jóhann Pétur í hópinn.

„Við erum stolt af því að fá Jóhann Pétur í liðið okkar enda hefur hann mjög sterkan og breiðan bakgrunn og mikla reynslu úr alþjóðlegu rekstrarumhverfi í viðbót við lögfræðiþekkinguna. PLAY stækkar hratt þessa dagana og við leggjum mikla áherslu á að skapa öflugt teymi sem getur unnið þétt saman í því kvika umhverfi sem flugrekstur er. Jóhann Pétur kemur svo sannarlega inn sem öflugur liðsmaður á sama tíma og það er stutt í leikgleðina hjá honum. Ég býð hann velkominn á leikvöllinn og hlakka til að vinna með honum í framtíðinni“