Morgunblaðið skýrir frá þessu.
Styrmir fæddist þann 27. mars 1938 í Reykjavík. Hann var sonur Salmaníu Jóhönnu Jóhannesdóttur og Gunnars Árnasonar og var hann elstur fimm systkina.
Styrmir kvæntist Sigrúnu Finnbogadóttur, sem lést 2016, og eignuðust þau tvær dætur, Huldu Dóru og Hönnu Guðrúnu.
Styrmir lauk embættisprófi í lögfræði frá Háskóla Ísland 1965. Hann var virkur í félagsmálum og var formaður Orators 1960-1961 og formaður Heimdallar 1963-1966. Varaborgarfulltrúi Sjálfstæðisflokksins 1966-1969.
Hann starfaði á Morgunblaðinu megnið af starfsævi sinni og byrjaði að skrifa reglulega í blaðið þegar hann var tvítugur. Hann hóf síðan störf á ritstjórn þess 1965 og starfaði þar allt þar til hann lét af störfum fyrir aldurs sakir þann 2. júní 2008. Þar af sem ritstjóri frá 1972.
Hann hélt áfram að skrifa um þjóðmálin eftir að hann lét af störfum og birtist síðasta grein hans í Morgunblaðinu í dag en það var eitt síðasta verk hans áður en hann lést að senda hana til blaðsins. Bók hans, Ómunatíð, vakti mikla athygli en í henni fjallaði Styrmir um geðsjúkdóm eiginkonu sinnar en hann lét sig geðheilbrigðismál alltaf miklu varða.
DV vottar fjölskyldu Styrmis samúð.
