Deiluaðilar í Húsafellsdeilunni eru nú að undirrita samkomulag sem felur í sér að hægt verður að hætta niðurrifi á steinasafni myndhöggvarans Páls Guðmundssonar á Húsafelli.
Kröfur Sæmundar Ásgeirssonar, nágranna Páls, hafa ekki breyst hvað varðar skiptingu bílastæða en vinna við aðalskipulag og deiliskipulag breytist mikið. Meðal annars verður skipt um hönnuð deiliskipulags að kröfu Sæmundar, samkvæmt samningnum sem DV hefur undir höndum.
Stærsta breytingin er sú að aðalskipulag verður ekki fyrir allt svæðið sunnan þjóðvegar en aðeins fyrir lóðir Páls og Sæmundar. Það var atriði sem Páll taldi óaðgengilegt en var ekki að kröfu Sæmundar heldur tillaga frá Borgarbyggð.
Sæmundur hafði í morgun fallið frá öllum bótakröfum á hendur Borgarbyggð en engu að síður ákvað sveitarstjórn að borga honum 5 milljónir sem var sama upphæð og Páll gerði kröfu um og fær greidda.
Sæmundur hefur tilkynnt Borgarbyggð að upphæðin skuli greiðast inn á reikning húsbyggingarsjóðs björgunarsveitarinnar Brákar í Borgarnesi.
Samkomulagið felur enn fremur í sér að Páll ábyrgist að legsteinum sem Sæmundur fékk að láni hjá eigendum eða umráðamönnum þeirra, en hurfu, verði skilað eða framvísað yfirlýsingu frá eigendunum eða umráðamönnum um að Páll eða einhver annar umsjónarmaður legsteinasafnsins hafi heimild til að geyma steinana.
Samkvæmt samkomulaginu verða dagsektir sem fallið hafa á Pál eftir að héraðsdómur úrskurðaði að hann ætti að rífa bygginguna felldar niður. Sæmundur fellur frá kröfum um að dómur Héraðsdóms Vesturlands í málinu verði fullnustaður.
