Þröstur Leó Gunnarsson, einn ástsælasti leikari þjóðarinnar, var gestur í útvarpsþættinum Mannlegi þátturinn á Rás 1. Þar ræddi hann um allt og ekkert en hann talaði meðal annars um það þegar konan hans fékk símtal þar sem spurt var hver væri að sjá um dánarbú Þrastar. „Ég veit það ekki, viltu ekki bara tala við líkið?“ sagði eiginkona hans þá og rétti Þresti símann.

Konan sem hringdi til að spyrja um dánarbúið afsakaði sig og sagði að þetta væri misskilningur. Þá mundi Þröstur að hann hafði séð dánartilkynningu um mann sem hafði svipað nafn og hann en misskilningurinn kom líklega þaðan. Hann segir að konan sem hringdi hafi verið í rusli þegar hún komst að því að hún hafi hringt í vitlausan mann. „Konugreyið var alveg í rusli,“ segir Þröstur í þættinum.

„Það var svo mikið gert grín að mér. Þetta var alveg hræðilegt.“

Það var þó ekki bara rætt um vitlausa dánarbúið heldur líka um sjómennsku Þrastar. Hann var aðeins 16 ára gamall þegar hann var byrjaður að fara á sjó en hann segir frá skemmtilegri sögu af sjónum í þættinum. Þröstur ætlaði nefnilega að fá sér húðflúr í einum túrnum en þá var hann einmitt bara 16 ára gamall. „Við fórum þarna fimm saman, vorum að drekka bjór á meðan við vorum að bíða, nema ég sofna,“ segir Þröstur en hann fékk ekki húðflúr þarna því húðflúrarinn vildi ekki húðflúra menn sem voru jafn ölvaðir og Þröstur var.

Þröstur var ekki sáttur með að fá ekki húðflúrið og vildi gera eitthvað annað í staðinn. „Ég ætla að láta lita á mér hárið strákar í staðinn,“ sagði hann við félaga sína þá. Þröstur fann hárgreiðslukonu til að lita hárið á sér grænt en hún sagði að það væri ekki tími til þess. Í staðinn fékk hann permanent.

„Ég er með svona þunnt sítt hát og hún setti í mig lambakrullur. Hárið skrapp svona saman og varð eins og hattur á mér þegar ég kom heim,“ segir Þröstur en hann fékk ekki mikið hrós frá móður sinni þegar hún sá hann, hún sagði að nú skyldi hann vera klipptur. Krullurnar fengu því að fjúka en Þröstur segir í viðtalinu að krullurnar hafi verið skotspónn háðs.

„Það var svo mikið gert grín að mér. Þetta var alveg hræðilegt.“