Á sjöunda tímanum í gær lentu rafskúta og bifreið í árekstri í miðborginni. Kona, sem stýrði rafskútunni, fann til eymsla í öxl og var flutt á Bráðadeild. Skömmu fyrir klukkan 20 féll kona af hjóli sínu á Kaldárselsvegi þegar hún hjólaði ofan í holu. Hún fann til eymsla í brjóstkassa og taldi sig vera viðbeinsbrotna. Hún var flutt á Bráðadeild. Á níunda tímanum datt maður af bifhjóli í Hafnarfirði. Hann fann til eymsla í rifbeinum.

Þrír ökumenn voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Einn þeirra reyndist ekki vera með gild ökuréttindi og annar reyndist vera sviptur ökuréttindum.

Á áttunda tímanum var ökumaður kærður fyrir að aka með 11 ára farþega sem notaði ekki öryggisbelti og stóð í farþegasætinu með höfuðið út um topplúgu. Barnaverndaryfirvöldum var send tilkynning um málið.