Maðurinn sem situr í haldi lögreglu, grunaður um morðið á Albananum Armando Bequirai, heitir Angjelin Sterkaj. Hann er líka frá Albaníu og er fæddur árið 1986. Þetta herma áreiðanlegar heimildir DV en lögregla hefur ekki gefið upp nafn mannsins. Hefðbundið er að nöfn grunaðra sakamanna birtist fyrst opinberlega þegar ákæra gegn þeim er gefin út. Búast má við ákæru á Angjelin í fyrsta lagi eftir 2-3 vikur en líklega eitthvað síðar. Rannsókn lögreglu lýkur líklega eftir tvær vikur og eftir það verður málið sent ákærusviði lögreglunnar sem sendir málið til héraðssaksóknara, sem tekur ákvörðun um hvort ákært verður, en í dag eru yfirgnæfandi líkur á því.
Maðurinn er skráður Angjelin Sterkaj í þjóðskrá en á samfélagsmiðlum kallar hann sig Angjelin Mark Sterkaj. Hann hefur búið á Íslandi í um 7 ár. DV veit ekki mikið um Angjelin. Þó liggur fyrir að óvild var á milli hans og Armandos, hins látna.
Armando rak öryggis- og dyravörslufyrirtæki ásamt nokkrum samlöndum sínum. Lögregla fullyrti á blaðamannafundi í dag að hann hefði haft tengsl við undirheima.
Fullyrða má að Angjelin sé mjög lítið þekktur og hafi lítið látið á sér bera. Jafnvel í undirheimum eru mjög fáir sem til hans þekkja. Hann bjó um tíma með konu í litlu fjölbýlishúsi í miðbænum og er skráður þar til heimilis í þjóðskrá ennþá, en var fluttur þaðan töluvert löngu áður en Armando var myrtur. Ekki er vitað hvar hann bjó síðast.
Angjelin var handtekinn þremur dögum eftir morðið á Armando. Hann neitaði sök þráfaldlega framan af rannsókninni og játaði ekki fyrr en gögn lögreglu gegn honum höfðu hlaðist svo mikið upp að hann var kominn upp að vegg.
Morðvopnið var 22 kalibera skammbyssa með hljóðdeyfi. Lögregla fann morðvopnið í sjó án þess að yfirheyrðir vísuðu á það. Lögreglumenn lásu á milli línanna í framburði yfirheyrðra og fundu morðvopnið út frá þeim upplýsingum. Byssunni var stolið frá aðila sem hafði leyfi fyrir henni. Því var morðvopnið upphaflega löglega skráð.
Möguleg meðsekt annarra aðila er enn til rannsóknar hjá lögreglu en staðfest er að lögregla telur að morðið hafi verið fyrirfram skipulagt.
Fram kom á upplýsingafundinum að lögregla telur sig vita morðástæðuna en gefur hana ekki upp. Óstaðfestar heimildir DV herma að persónuleg óvild milli Armandos og Angjelin sé helsta ástæða morðsins. Sá orðrómur sannar hvorki né afsannar að málið geti tengst flóknari átökum og uppgjöri í undirheimum.
