Fréttablaðið skýrir frá þessu í dag. Haft er eftir Sigvalda að það sem tengist námi unga fólksins komi nokkuð vel út ekki sé hægt að segja það sama um það sem snýr að andlegri líðan. „Ég mun kynna niðurstöður könnunar sem við hjá SÍF framkvæmdum og Margrét mun kynna niðurstöður Rannsóknar og greiningar og þær sýna allar svart á hvítu hvernig andlegri heilsu nemenda hefur hrakað síðustu ár,“ er haft eftir honum.
Hann sagði að niðurstöður rannsóknar SÍF sýni að um 8% nemenda í framhaldsskólum séu í áhættuhópi vegna COVID-19 og að 47% eigi náinn aðstandanda í áhættuhópi. „Þessi hópur nemenda er líklegri til að upplifa verri andlega heilsu en aðrir hópar og það þarf bæði að hlúa vel að honum og veita honum sveigjanleika,“ sagði hann.
Hann sagði mikla óvissu hafa einkennt námið í framhaldsskólum á síðustu önnum og það geti verið streituvaldandi fyrir nemendur. „Þetta er mikið álag á nemendur og til eru dæmi þess að nemendur sem ekki gátu eða ekki treystu sér til að mæta í skólann vegna þess að þau eða einhver náinn þeim voru í áhættuhópi, hafi verið bent á að skrá sig í fjarnám,“ sagði hann og bætti við að þetta geti orðið til að útgjöld nemenda aukist.
Hann sagði að 42% allra nemenda hefðu upplifað fjárhagserfiðleika og 70% þeirra sem eru á leigumarkaði. Hann sagði að mikilvægt sé að tryggja sálfræðiþjónustu í alla framhaldsskóla og að hún sé ókeypis. „Andleg heilsa er í frjálsu falli meðal þessa hóps. Biðlistar eftir sálfræðiaðstoð eru alltof langir og aðstoð á einkastofum er kostnaðarsöm og mikið álag er á náms- og starfsráðgjöfum. Það þarf að finna leiðir til að laga þetta,“ sagði hann.
