Fréttablaðið skýrir frá þessu í dag. „Þetta er eins og að þurfa sífellt að taka spretthlaup án undirbúnings. Þetta verður að tilfinningalegum óróa og okkur stendur ekki alveg á sama. Það er okkur flestum ekki eðlislægt að jörðin undir fótum okkar hristist,“ er haft eftir Sjöfn sem sagði eina helstu ástæðu kvíða vera stjórnleysið því við ráðum ekki við náttúruhamfarir eða óróa. „Við vitum ekki hvort skjálftarnir séu að verða búnir eða hvort þeir haldi áfram,“ sagði hún.
Hún sagði einnig að við þetta bætist umræða um stærri skjálfta í Brennisteinsfjöllum og eldgos á Reykjanesi. „Undir niðri erum við öll að undirbúa okkur undir þessa atburði því að það er búið að tala um þá,“ sagði hún og bætti við að óöryggi grípi um sig og fólk fari að huga að ýmsu sem það hafi ekki hugað að áður, til dæmis að festa húsgögn og útbúa neyðartöskur.
Hún sagði einnig að sumir þori ekki upp í háar byggingar og líkamlega einkenni eins og þreytta geri vart við sig. Einnig einbeitingarskortur og einhverskonar sjóriða. „Það spilar einnig inn í að við höfum búið lengi við óvissuástand vegna faraldursins. Fólk er orðið langþreytt á þessu öryggisleysi sem við höfum upplifað undanfarið ár,“ sagði hún.
Hún sagði mikilvægt að fólk ræði líðan sína, ef því líður illa og er smeykt, við fólk sem því þyki gott að ræða við. Einnig sé mikilvægt að hlúa vel að sjálfum sér, passa upp á svefninn og hlusta á sérfræðinga sem hafa ítrekað að fólk geti verið rólegt heima hjá sér. Ef óttinn verði viðvarandi geti verið gott að leita til fagfólks.
