Tölvuþrjótar brutust inn í netkerfi Strætó í gær og ekki er hægt að útiloka upplýsingaleka í tengslum við innbrotið. Þetta kemur fram í tilkynningu frá Strætó.

Strætó segir í tilkynningu að fyrirtækið sé í náinni samvinnu núna við sérfræðinga frá Syndis og Advania við að staðfesta atburðarás og greina umfang innbrotsins, eins hvort og þá hvaða upplýsingar þeir komust yfir.

Strætó bendir á að fyrirætkið sendi aldrei frá sér töluvpósta þar sem óskað er eftir kortaupplýsingum.

Hér er tilkynning Strætó í heild sinni:

„Strætó þykir leitt að tilkynna innbrot í netkerfi Strætó sem uppgötvaðist í gær, 27. desember 2021. 

Unnið er að staðfestingu atburðarásar og greiningu á umfangi í náinni samvinnu við sérfræðinga hjá Syndis og Advania. Atvikið hefur verið tilkynnt til Persónuverndar, CERT–IS og lögreglu.

Ekki er hægt að útiloka upplýsingaleka í tengslum við innbrotið, en of snemmt er að segja til um hvort og hvaða upplýsingar innbrotsþjófarnir komust yfir.  

Nú þegar hefur gripið til allra aðgerða til að fyrirbyggja hættuna á frekari gagnalekum.

Það skal þó ítrekað að Strætó sendir  aldrei út tölvupósta þar sem fólk er beðið um kortaupplýsingar.“