Nýjasti gestur bræðranna Gunnars og Davíðs Wiium í hlaðvarpsþættinum Þvottahúsið er Arnar Þór Jónsson, lögmaður og varaþingmaður Sjálfstæðisflokksins.
Í þættinum er rætt mikið um Covid-19 faraldurinn og takmarkanirnar sem gerðar hafa verið hér á landi vegna hans. Hann segir til að mynda að bóluefnið gegn veirunni sé tilraunefni og að fólk sem þiggur bólusetninguna sé ekki nógu upplýst um mögulegar aukaverkanir.
Arnar talar um Þórólf Guðnason sóttvarnalækni en ljóst er að hann er allt annað en sáttur með störf hans. Hann vill meina að það vald sem Þórólfur hefur sé óeðlilegt og óábyrgt, sérstaklega í ljósi þess að hann afsali sér í raun allri ábyrgð á þeim ákvörðunum sem teknar eru í sambandi við sóttvarnaaðgerðir því alltaf sé aðeins um minnisblöð frá honum að ræða, ekki lokaákvarðanir.
„Þórólfur er eflaust bara góður drengur og vel meinandi en að hafa einn mann með ótemprað svona vald, sérfræðivald sem að þar að auki er settur á stall af læknastéttinni og það má engin gagnrýna manninn, þetta er sjúklegt ástand,“ segir Arnar í þættinum.
Þá segir Arnar að hann telji að Þórólfur megi líta alvarlega í eigin barm. „Nú ætla ég bara að segja það hér í þessari útsendingu að ég teli að Þórólfur megi sko fara að líta alvarlega í eigin barm og ég telji að honum hafi orðið á alvarleg mistök 13 desember sem ættu líklegast að verða til þess að hann segi af sér.“
