Nú árið er senn liðið í aldanna skaut og því kominn tími hjá DV til að velja manneskju ársins 2021. Að venju var lesendum gefinn kostur á að senda inn tilnefningar og stóð ekki á viðbrögðunum. Fjöldi tilnefninga hefur líklega sjaldan verið meiri en eftirfarandi níu einstaklingar og ein samtök stóðu þó uppúr hvað fjölda tilnefninga varðar.
Hægt er að lesa nánar um þau tilnefndu hér fyrir neðan og svo getur þú, lesandi kær, greitt þeim atkvæði sem þú telur að eigi skilið titilinn manneskja árins 2021.
Þau eru tilnefnd sem manneskja ársins hjá DV árið 2021:
Guðmundur Felix gekkst undir sögulega aðgerð á árinu þar sem tveir handleggir voru græddir á hann, en hann hefur vakið mikla eftirtekt fyrir jákvætt hugarfar, þrautseigju og dugnað. Hér má lesa nokkur dæmi um athugasemdir þeirra lesenda sem tilnefndu Guðmund Felix:
„Hann er hetja og fyrirmynd fyrir jákvæðni, kjark og heiðarleika.“
„Ber höfuð og herðar yfir alla. Maður aldarinnar. Þvílík þrautseigja, hugrekki og dugnaður hefur ekki sést hingað til hjá núlifandi íslendingum.“
Aktívistarnir í Öfgum hafa vakið mikla eftirtekt á árinu sínu fyrir baráttu sína gegn þöggun og vitundarvakningu um stöðu kynferðisbrota hér á landi. Dæmi um það sem lesendur sögðu í tilefningum eru:
„Fyrir ötula baráttu gegn nauðgunarmenningu, kynbundnu ofbeldi og gerendameðvirkni.“
„Fyrir þrotlausa baráttu þeirra gegn kynferðisofbeldi og baráttu fyrir betra samfélagi“
Sóttvarnalæknir, Þórólfur Guðnason, hefur áfram verið áberandi í umræðunni og baráttunni við veiruna skæðu. Lesendur höfðu meðal annars eftirfarandi að segja um hann í tilnefningum sínum:
„Hann er búinn að bjarga þjóðinni í þessum COVID-heimsfaraldri“
„Er þakklát fyrir að eiga svo traustan og gegnheilan mann í COVID-19 brúnni.“
Ragnheiður Ósk er framkvæmdastjóri hjúkrunar hjá Heilsugæslu höfuðborgarsvæðisins og hefur gegnt lykilhlutverki í að bólusetja þjóðina. Í tilnefningum sagði meðal annars:
„Stóð sig frábærlega í skipulagningu bólusetninga og var glæsileg talskona framvarðasveitarinnar í því stóra og mikilvæga verkefni.“
„Hennar glaðlega framkoma í fjölmiðlum þar sem jákvæðni og bjartsýni hafa verið í fyrirrúmi hefur átt stóran hlut í því að gefa bólusetningarherferðinni það góða yfirbragð sem hún hefur.“
Kári Stefánsson, forstjóri Íslenskrar erfðagreiningar, hlaut fjölda tilnefninga sem flestar voru hreinlega rökstuddar með eftirfarandi snarpa en skýra hætti: „Fyrir óeigingjarnt starf í þágu þjóðar“ en eins og flestir vita hefur fyrirtæki Kára spilað stórt hlutverk í baráttunni við veiruna.
Vanda Sigurgeirsdóttir, formaður Knattspyrnusambands Íslands, gekk inn í starf sambandsins á erfiðum tímum eftir að sambandið var sakað um þöggun um meint kynferðisbrot landsliðsmanna. Með tilnefningum sögðu lesendur meðal annars:
„Fyrir að taka við KSÍ á erfiðum tímum og vera óhrædd við að sýna mannlega hlið þess að þurfa að taka þátt í erfiðum ákvörðunum.“
„Er að draga KSÍ og íþróttahreyfinguna upp úr svaðinu“
Haraldur hefur staðið fyrir verkefninu „Römpum upp Reykjavík“ og bætt aðgengi hreyfihamlaðra í borginni til muna. Lesendur þakka honum óeigingjarnt starf hans í tilnefningum þar sem segir meðal annars:
„Árum og áratugum saman hafa samtök fatlaðra barist fyrir þessum umbótum en ekkert gengið of vel þar til Haraldur kemur inn í verkið eins og hvítur stormsveipur“
„Fyrir verkefnið Römpum upp Reykjavík. Þvílík snilld.“
Þegar nokkra mánaða gamall drengur var hætt kominn þurfti Rúna Sif ekki að hugsa sig um tvisvar, þvert á móti taldi hún sig hafa unnið lottóvinning þegar hún komst að því að hún gæti gefið litla drengnum lífsgjöf með því að gefa honum hluta úr lifri sinni.
„Drengnum vegna gríðar vel í dag, þökk sé lífsgjöf þessarar hetju“
„Hún gaf líf og hvað er fallegra“
Fjölmiðlamaðurinn Helgi Seljan hefur verið áberandi í umræðunni um útgerðina Samherja, en hart hefur verið sótt að honum úr ýmsum áttum fyrir hlut sinn í því að ljóstra upp um meint lögbrot fyrirtækisins í Namibíu. Í tilnefningum segir meðal annars:
„Fyrir hugrekki að taka fyrir umfjöllun um spillinguna sem er víða hér á landi.“
Samfélagsmiðlastjarnan og baráttukonan Edda Falak hefur verið afar áberandi í umræðunni á árinu, þá einkum fyrir baráttu sína gegn kynferðislegu ofbeldi, nauðgunarmenningu og þöggun. Í tilnefningum segir meðal annars:
„Hefur bæði kjark og þor og hefur staðið sig frábærlega í ár með podkastið sitt, þrátt fyrir allskonar hótanir þá lætur hún það ekki beygja sig. Hún er flott fyrirmynd og stendur fyrir ímynd sjálfstæðrar og sterkrar konu“
