Samkvæmt frétt Vísis mun allsherjar- og menntamálanefnd Alþingis vera að hugleiða að svipta listamanninn Megas heiðurslausnum vegna ásakana í hans garð um kynferðisbrot.

Bergþóra Einarsdóttir steig fram í Stundinni seint í nóvember og sakaði Megas um kynferðisbrot gegn sér, í félagi við annan mann, árið 2004. Bergþóra kærði málið til lögreglu á sínum tíma en því var vísað frá. Bergþóra segir ennfremur að Megast hafi síðan samið ljótan texta um sig og atvikið, við lag sem heitir Litla ljót.

Steinunn Ólína Þorsteinsdóttir veltir vöngum yfir þessu í nýjum Facebook-pistli. Segir hún Allsherjar- og menntamálanefnd vera á villigötum ef hún sé raunverulega að hugleiða að svipta Megas heiðurslaunum. Ólína staðhæfir að ljóð Megasar, Litla ljót, sé ekki um Bergþóru heldur sé umrædd Litla ljót byggð á karakter eftir Guðberg Bergsson.

Pistill Steinunnar Ólínu er eftirfarandi:

„Allsherjar og menntamálanefnd er á villigötum ef þetta eru raunverulegar vangaveltur, að svipta eigi Megas heiðurslaunum.

Mig langar að benda á að viðbjóðsljóðið umrædda, Litla ljót, er byggt á karakter eftir Guðberg Bergsson sem ég fékk að leika í leikgerðinni,Sannar Sögur af sálarlífi systra, sem unnið var upp úr Tangabókum Guðbergs. Karakterinn heitir Dídí, hún er hölt, misþroska, ljót og miskunarlausir karlar sífellt að ,,sprauta” í hana. Ljót saga um illa meðferð á varnarlausum.

Ég dreg ekki í efa vanlíðan þá sem Bergþóra lýsir að samskipti hennar við Megas og Gunna súkkat hafi haft en ljóð Megasar um Litlu ljót er EKKI um Bergþóru. Annað sem er næsta víst er að kveðskapur Megasar mun lifa okkur öll hvort sem okkur líkar betur eða verr.“