Hæstiréttur mildaði í dag dóm yfir nauðgara sem beitti konu ótrúlegum blekkingum, villti á sér heimildir í samskiptum við hana á Snapchat og þóttist vera annar maður. Hann mælti sér oftsinnis mót við hana á hótelbergjum, fékk hana til að hylja augu sín og hafði kynmök við hana á þeim forsendum að hann væri annar maður.
Maðurinn var dæmdur í fjögurra ára fangelsi í héraðsdómi fyrir brot sín og Landsréttur staðfesti þann dóm. Hæstiréttur mildaði hins vegar dóminn um eitt ár og felldi út einn ákærulið gegn manninum. Var þar fallist á þau sjónarmið mannsins að sá ákæruliður hefði verið of óskýr til að hann gæti tekið nægilega afstöðu til hans. Snerist sá ákæruliðir um að maðurinn hefði neytt konuna til samræðis með öðrum mönnum með hótun um að birta kynferðislegar myndir af henni sem hann hafði fengið hana til að senda sér. Var hann einnig sakfelldur fyrir að hafa fengið hana til að senda sér þessar myndir á þeim fölsku forsendum að hann væri annar maður.
Eins og fyrr segir mildaði Hæstiréttur dóminn yfir manninum um hálft ár en hækkaði hins vegar þær miskabætur sem hann er dæmdur til að greiða konunni, úr 1,8 milljónum króna upp í 2 milljónir. Í röksemdum fyrir ákvörðun miskabóta til handa þolanda mannsins segir svo um athæfi mannsins, í dómi Hæstaréttar:
„68. Þau brot sem ákærði hefur verið sakfelldur fyrir samkvæmt 1. og 3. lið ákærunnar eru sem fyrr segir mörg og stóðu yfir í langan tíma. Til þess að fremja brotin hafði hann samskipti við brotaþola á samskiptamiðlum undir nafni annars manns sem hún var hrifin af og stóð hún í þeirri trú að samskiptin væru við hann. Alvarlegust eru brot ákærða gegn kynfrelsi brotaþola samkvæmt 3. lið ákæru. Brotin voru framin af algeru skeytingarleysi um tilfinningar og andlega heilsu brotaþola og til þess fallin að grafa undan sjálfsmynd hennar. Af gögnum málsins er ljóst að brotin ollu henni miklum og langvarandi miska. Að þessu gættu en að öðru leyti með vísan til forsendna héraðsdóms sem vísað var til í hinum áfrýjaða dómi verða miskabætur til brotaþola ákveðnar 2.000.000 króna.“
Maðurinn er ekki nafngreindur í dómi Hæstarréttar en Vísir.is nafngreinir hann. Heitir maðurinn Gabríel Varada Snæbjörnsson. Í dómi Hæstaréttar er vikið að þeim vanda sem heimur samfélagsmiðla og nútíma snjalltækni hefur á meðferð kynferðisbrota í réttarkerfinu, segir þar:
„36. Þær nýju samskiptaleiðir sem samfélagsmiðlar bjóða upp á hafa valdið byltingu í samskiptum manna í milli. Þessir nýju miðlar hafa skapað möguleika á ýmiss konar áður óþekktum leiðum til að villa á sér heimildir og beita blekkingum og hótunum, þar á meðal í kynferðislegum tilgangi. Enda þótt umfangsmeiri breytingar hafi verið gerðar á kynferðisbrotakafla almennra hegningarlaga en á nokkrum öðrum kafla laganna á síðustu áratugum hefur löggjafinn átt fullt í fangi með að mæta kröfum um aukna refsivernd kynfrelsis einstaklinga og bregðast við þeim nýju tæknilegu möguleikum sem samfélagsmiðlar hafa skapað til brota í kynferðislegum tilgangi.
37. Lögregla, ákæruvald og dómstólar hafa jafnframt þurft að aðlaga rannsóknaraðferðir, ákærusmíð og beitingu refsiákvæða að nýrri tækni og nýjum samskiptamöguleikum. Rannsókn brota af þessu tagi getur verið flókin og tímafrek og tíðar breytingar á kynferðisbrotaákvæðum allt frá árinu 1992 hafa skapað vanda fyrir ákæruvald og dómstóla við að marka lagaskil milli eldri og yngri refsiákvæða en mikilvægt er að huga að þeim þætti við lagasetningu.“
