Magnus Carlsen varði í dag heimsmeistaratitil sinn þegar hann bar sigur af áskoranda sínum, Ian Nepomniachtchi, í elleftu skák heimsmeistaraeinvígisins í Dubai. Sigurinn þýðir að Carlsen tryggði sér þar með 7,5 vinninga og þar með er einvíginu lokið. Alls átti einvígið að vera 14 skákir og því urðu yfirburðir Norðmannsins til þess að ekki er nauðsynlegt að tefla þrjár síðustu skákirnar.

Skák dagsins var frekar róleg framan af en á ögurstundu gerði Nepó sig sekan um slæm mistök sem gáfu Carlsen færi á að fórna skiptamun með vinningsstöðu. Norðmaðurinn missir ekki af slíkum tækifærum og tefldi lokin fullkomlega.

Carlsen sýndi fádæma yfirburði í seinni hluta einvígisins þar sem hann vann fjórar skákir af síðustu sex skákunum. Í fimm fyrstu skákunum var allt í járnum og var það jafnvel sá norski sem var frekar í taphættu en áskorandinn í annarri skákinni.

Eftir átta klukkustunda og 136. leikja rothögg í sjöttu skák einvígisins sá Rússinn ekki til sólar og Carlsen kafsigldi hann í kjölfarið.

Sigurinn þýðir að Carlsen hampar heimsmeistaratitlinum í fimmta sinn en fyrst varð hann heimsmeistari árið 2013. Áætlað er að næsta heimsmeistaraeinvígi fari fram í lok árs 2022 eða byrjun árs 2023 þannig að Norðmaðurinn getur andað rólega í bili og fylgst með andstæðingum sínum berjast á banaspjótum.

Á næsta ári fer fram áskorendamót átta sterkustu skákmanna heims, fyrir utan Carlsen, þar sem teflt verður um réttinn til að skora á heimsmeistarann. Áskorandinn fallni, Ian Nepomniachtchi, fær sjálfkrafa sæti í því móti og getur því sleikt sárin og skipulagt endurkomu sína.