Hvort sem maður drekkur kók, pepsi eða hvorugt þá er það löngu orðin jólahefð hjá mörgum hér á landi að fylgjast með ferðalagi jólalestar Coca–Cola en jólalestin hóf sína árlegu hringferð um höfuðborgarsvæðið fyrir 26 árum síðan.

Jólalestin verður á ferðinni á morgun, laugardaginn 11. desember og leggur af stað klukkan 17:00. Nú verður hægt að fylgjast með ferðalagi lestarinnar í gegnum sérstaka vefsíðu þar sem staðsetningin verður gefin upp í rauntíma.

Í tilkynningu frá Cocca–Cola á Íslandi segir:

„Ljósum prýdd jólalest Coca–Cola leggur af stað frá Stuðlahálsi kl. 17:00, laugardaginn 11. desember í ár en þaðan ferðast hún um helstu hverfi höfuðborgarinnar og nærsveita áður en hún snýr aftur heim. „Því miður mun jólalestin ekki stoppa á völdum stöðum í ár vegna sóttvarna, en að venju hafa stórir hópar fólks á öllum aldri safnast saman á þeim stöðum. Við vonumst þó til að geta endurvakið þá hefð að ári,“ segir Einar Snorri Magnússon, forstjóri Coca–Cola á Íslandi og segir það einlæga von alls starfsfólks að sem flestir eigi gleðileg og sóttfrí jól. 

Jólalestin er mikið sjónarspil og keyrir um höfuðborgarsvæðið með skemmtileg jólalögum í fylgd bæði lögreglu og Hjálparsveit Skáta, sem tryggja að allt gangi vel fyrir sig. Lögreglan á höfuðborgarsvæðinu beinir því til fólks að sýna aðgát og koma ekki of nálægt lestinni.“ 

Það varst þú sem komst með jólin til Svölu og Björgvins Halldórssonar, en á heimili blaðamanns er það jólalestar-auglýsingin sem kemur með jólin á heimilið. Það er fyrst þegar búið er að horfa á auglýsinguna sem jólin mega koma fyrir blaðamanni.

Einar Snorri tekur í svipaðan streng en haft er eftir honum í tilkynningu:

„Það er ekki bara jólalestin sem kemur til landsmanna á ári hverju heldur einnig hin klassíska jólaauglýsing Coca–Cola, „Holidays are coming“ en hún kemur ófáum í jólagírinn og hefur verið sýnd í sjónvarpi á Íslandi á hverju ári síðan 1995, og munum við að sjálfsögðu halda í þá hefð.

Við gerum þó ávallt eitthvað nýtt í bland og jólaauglýsing Coca–Cola í ár færir okkur fallega jólasögu um fólkið í blokkinni og hvernig jólin geta verið töfrandi, ef við njótum þeirra saman.“