Systir Daníels heitins Eiríkssonar, sem lést á föstudaginn langa eftir átök við rúmenskan mann sem nú hefur verið ákærður fyrir manndráp af gáleysi, er mjög ósátt við þá niðurstöðu að ákæra manninn ekki fyrir ásetningsbrot. Rúmeninn hefur ávallt haldið því fram að um slys hafi verið að ræða.

Fjölskyldan telur að áverkar á Daníel hafi verið of miklir til að um slys geti verið að ræða.

„Vorum bara að frétta þetta í gegnum Vísir.is, vinkona mín sendi mér link. Við vissum bara að þetta væri í rannsókn en höfðum ekki heyrt neitt meira,“ segir Guðný Sigríður Eiríksdóttir, systir Daníels, í samtali við DV. Hún segir föður sinn, Eirík Sigurbjörnsson, einnig vera afar ósáttan við stöðu málsins:

„Ég heyrði í pabba áðan og hann sá þetta líka bara í fréttunum. Hann hafði ekkert heyrt í rannsóknarlögreglunni.“ Að sögn Guðnýjar finnst Eiríki lögregla hafa sýnt fjölskyldunni vanvirðingu með því að upplýsa þau ekki um stöðu málsins svo þau þurftu að frétta um þessa niðurstöðu í gegnum fjölmiðla.

Kona ein sem var nágranni Daníels hefur tjáð fjölskyldunni að hún hafi séð manninn bakka á Daníel. Konan hefur hins vegar ekki fengist til að gefa hann vitnisburð formlega hjá lögreglu, að sögn vegna ótta og einnig vegna tortryggni í garð lögreglu. Guðný telur einnig að lögregla hafi almennt ekki talað nógu vel og ítarlega við nágranna Daníels.

Í ákærunni gegn rúmenska manninum segir að Daníel hafi haldið með báðum höndum um hliðarrúðu á bíl sem Rúmeninn ók og dregist þannig eða hlaupið með bílnum tæpa 14 metra þar til hann féll í jörðina. Var bílnum ekið á 15 til 20 km/klst. Þetta kemur fram á vef RÚV.

Er maðurinn einnig ákærður fyrir að vanrækt að koma Daníel til hjálpar.

Fjölskylda Daníel krefur Rúmenann um 15 milljónir króna í skaða- og miskabætur.