Samþykkt var á síðasta fundi borgarstjórnar Reykjavíkur að veita allt að 116 milljónir króna viðbótarframlag til Hörpu tónlistar- og ráðstefnuhúss vegna COVID-19.
Fjárhagsáætlun Hörpu gerir ráð fyrir neikvæðri afkomu sem nemur rúmlega 252 milljónum króna og tók tillaga um viðbótarframlag mið af því. Tillagan var lögð fram af borgarfulltrúum Samfylkingarinnar, Viðreisnar, Pírata og Vinstri grænna.
Gerður er fyrirvari um sambærilegt framlag ríkisins sem fer með 54% eignarhlut í Hörpu á móti Reykjavíkurborg sem fer með 46% eignarhlut. Þar sem um aukaframlag er að ræða til eins árs verði það fjármagnað með viðauka við fjárhagsáætlun í janúar 2022 af liðnum ófyrirséður kostnaður.
Borgarfulltrúar Sjálfstæðisflokksins, Sósíalistaflokks Íslands og Miðflokksins sátu hjá við afgreiðslu málsins.
Tæplega 200 milljóna króna tap var af rekstri samstæðu Hörpu á síðasta ári vegna COVID-19, meðal annars vegna langvarandi lokana og tekjufalls. Tekjur Hörpu höfðu þá lækkað um 56% milli ára og námu í fyrra 537 milljónum króna, samanborið við 1,2 milljarð árið 2019. Viðbótarframlag frá Reykjavíkurborg og ríkinu nam í fyrra 278 milljónum.
