Hildur Björnsdóttir tilkynnti rétt í þessu að hún hyggðist gefa kost á sér í komandi oddvitaslag innan Sjálfstæðisflokksins fyrir komandi sveitarstjórnarkosningar. Þetta kom fram í þættinum Ísland í dag á Stöð 2 nú rétt í þessu sem og á Facebook og Instagram síðu Hildar.
Hildur fór um víðan völl í viðtali sínu í Íslandi í dag og nefndi meðal annars að vinna þyrfti bug á því menningarstríði sem núverandi meirihluti í borgarstjórn hefði komið af stað og geisaði nú milli ólíkra póstnúmera í borginni og sagði ekkert því til fyrirstöðu að tækla málin héðan af þannig að fleiri séu sáttir með störf stjórnvalda í ráðhúsinu.
Í framboðstilkynningu hennar á Facebook segir:
Með sjálfstæðismönnum vil ég skapa borg sem virkar fyrir fólk og fyrirtæki. Höfuðborg sem setur fjölskyldur í forgang – skóla sem mæta fjölbreyttum þörfum og leikskóla sem tryggja inngöngu strax í kjölfar fæðingarorlofs. Ég vil borgarumhverfi sem styður við fjölbreytileika mannlífsins – og laðar að sér hæfileikafólk með úrvali atvinnutækifæra, lifandi menningu, spennandi búsetukostum og greiðum samgöngum fyrir alla.Ég vil borg sem ryður veginn fyrir þá sem vilja sækja fram og styður við hugmyndaauðgi og verðmætasköpun. Umhverfisvæna höfuðborg sem byggist á frjálsum valkostum, jöfnum tækifærum, frjálsu framtaki og hagkvæmum rekstri.
Ég vil lifandi smáborg með heimsborgarhjarta – frjálsa og blómstrandi — Reykjavík sem virkar.
