Aftur kom til átaka í Hagkaupum í Spönginni í gærkvöldi er hópur ungmenna, sem talin eru hafa verið undir áhrifum áfengis, gekk inn í búðina. Einn úr hópnum neitaði að bera grímu og brást ókvæða við er öryggisvörður reyndi að vísa honum út úr versluninni. 

Vísir ræddi við Ásgeir Þór Ásgeirsson, yfirlögregluþjón almennrar löggæslu hjá lögreglunni á höfuðborgarsvæðinu, um málið en hann segir að árásarmaðurinn hafi flúið af vettvangi.

„Ungir menn sem eru ölvaðir koma í verslunarmiðstöð í Grafarvogi og einn úr hópnum vill ekki bera grímu. Þeir gera athugasemd við það öryggisverðir, maðurinn er beðinn að fara út og við innganginn kastar viðkomandi flösku í andlitið á öryggisverðinum og hann skerst aðeins“ 

Ásgeir reiknar með að upptökur öryggismyndavéla muni hjálpa til við að hafa hendur í hári árásarmannsins sem líkt og áður segir flúði af vettvangi.

Vitni að árásinni deildi færslu um málið inn á íbúahópi Grafarvogsbúa og sagði árásarmanninn hafa verið hluta af um 8-10 manna hóp af ungmennum. Vitnið hvetur foreldra ungmenna í hverfinu að ræða við sín börn, um afleiðingar af ofbeldisbrota og eins hvetja þá sem voru á staðnum þetta kvöld að gefa sig fram við lögreglu því vitnið taldi ljóst að margir úr ungmennahópnum hafi verið mótfallnir ofbeldinu.. „Þetta er algjörlega farið úr böndunum.“

Vitnið lýsti árásinni með eftirfarandi hætti:

„Það átti önnur fólskuleg árás sér stað í Hagkaup í kvöld þegar einn úr þessum stráka hóp smallar bjórflösku á andlitinu á öryggisverðinum, sem endar alblóðugur, eftir að hafa verið visað út.“ 

Þetta er í annað sinn í vikunni sem kemur til átaka milli starfsmanna Hagkaupa og ungmenna í vikunni en á miðvikudag gekk unglingur í skrokk á afgreiðslumanni en DV hefur heimildir fyrir að einn starfsmaður verslunarinnar hafi nefbrotnað í þeirri árás.

Sjá einnig: Árásarmaður í Spönginni er barn – Bæði hann og afgreiðslustúlkan flutt á slysadeild – Maður sem yfirbugaði árásarmann ræðir við DV

Vitni af afleiðingur árásarinnar í gærkvöldi setti sig í samband við DV og lýsti aðstæðum svo:

„Sá manninn í anddyrinu þegar ég var að labba úr búðinni, alblóðugan á andlitinu, sá síðan lögreglukonu hjá honum þegar ég kom í anddyrið og sjúkraflutningamenn á leiðinni inn til hans. Það voru blóðslettur fyrir utan búðina.“ 

Sá sagði nokkurn viðbúnað hafa verið á svæðinu, en hann taldi þrjá lögreglubíla og einn sjúkrabíl.