Joe Biden Bandaríkjaforseti er á leið í ristilspeglun í dag og mun þurfa að gangast undir svæfingu vegna aðgerðarinnar. Vald forseta Bandaríkjanna mun því tímabundið flytjast til varaforseta Bandaríkjanna, Kamala Harris.

Slík valdatilfærsla er nokkuð algeng og er Biden fjarri því að vera sá fyrsti til þess að sigla í gegnum heilt kjörtímabil án þess að gefa valdið frá sér tímabundið til varaforsetans.

Hins vegar er valdatilfærslan í dag söguleg að því leiti að Kamala Harris verður í dag fyrsta konan til þess að fara með vald forseta Bandaríkjanna, þó tímabundið sé.

Það er ekki seinna vænna fyrir Biden að skella sér í ristilspeglun, en hann fagnar 79 ára afmæli sínu á morgun. Þá verða jafnframt 10 mánuðir liðnir frá því að hann tók við sem forseti.

Biden hefur verið opinskár um heilsu sína, þvert á forvera sinn sem veitti engar slíkar upplýsingar allt kjörtímabilið sem hann gegndi embættinu. Ristilspeglunin mun fara fram á hersjúkrahúsinu Walter Reed í Washingtonborg og er búist við að Biden verði orðinn forseti á ný áður en sólin sest á Hvíta húsið þetta föstudagskvöld.