Helgi Jóhannesson, fyrrum yfirlögfræðingur Landsvirkjunar, sagði af sér úr stjórn Ferðafélags Íslands á fimmtudaginn. Fréttir af því bárust í kjölfar þess að Stundin greindi frá því að starfslok Helga hjá Landsvirkjun hafi átt sér stað í kjölfar áminningar um ótilhlýðilega háttsemi í garð samstarfskonu.
Nú hefur Stundin greint frá því að mál tengt Helga og konu, sem í dag er þrítug, hafi komið inn á borð félagsins áður en starfslok Helga hjá Landsvirkjun rötuðu í fjölmiðla.
Stundin hefur heimildir fyrir því að umrætt mál hafi átt sér stað fyrir um áratug síðan þegar konan var tæplega tvítug. Þar kemur fram að konan hafi í tvígang fundað með forsvarsmönnum Ferðafélagsins vegna málsins og greint þeim frá sinni hlið mála og samskiptum við Helga. Mun málið meðal annars lúta að kynferðislegri áreitni.
Forseti Ferðafélagsins, Anna Dóra Sæþórsdóttir, sagðist ekki geta tjáð sig um málefni einstakra starfsmanna eða stjórnarmanna þegar Stundin leitaði viðbragða en sagði þó að slík mál væru meðhöndluð í samræmi við viðbragðsáætlun félagsins.
DV greindi á laugardag frá færslu lögmannsins Telmu Halldórsdóttur á Facebook þar sem hún rifjaði upp metoo-sögu sem hún ritaði árið 2017 fyrir hönd vinkonu sinnar sem lenti í kynferðislegri áreitni á vinnustað og var rekin úr starfi þegar hún leitaði til yfirmanna. Samkvæmt áreiðanlegum heimildum DV mun Helgi vera meintur gerandi í málinu.
