Nemendafélag Fjölbrautaskóla Norðurlands vestra á Sauðárkróki heldur viðburðinn Látum Skagafjörðinn lýsa fyrir Erlu Björk en hann snýst um að fólk láti útikerti loga fyrir utan heimili sín kl. 20 á miðvikudagskvöld.

Er þetta gert í minningu Erlu Bjarkar Helgadóttur sem varð bráðkvödd þann 2. nóvember. Erla Björk lætur eftir sig fjögur börn og eiginmann. Hún á son í fjölbrautaskólanum og vill nemendafélagið sýna fjölskyldunni samhug og heiðra minningu Erlu Bjarkar sem hefði orðið fertug á þeim degi sem viðburðurinn er, þann 10. nóvember.

Erla Björk tengist skólasamfélaginu í Skagafirði sterkum böndum en hún starfaði í Varmahlíðarskóla og var í foreldrafélagi Fjölbrautarskóla Norðurlands vestra.

„Morguninn sem þetta gerðist tókum við fund í nemendafélaginu. Við viljum gera það sem við getum fyrir þessa fjölskyldu og sérstaklega þar sem sonur hennar er í nemendahópnum,“ segir Helena Erla Árnadóttir, formaður nemendafélagsins. „Við ákváðum þetta daginn eftir en höfum verið að bíða dálítið með að setja eitthvað út, af tillitsemi við aðstandendur. En við vildum gera þetta annað kvöld,“ segir hún enn fremur, en eins og áður segir er dagsetningin 10. nóvember mikilvæg því það er fertugsafmælisdagur Erlu Bjarkar.

Helena segir að allir landsmenn geti tekið þátt í þessari ljósastund en eðlilega beinist tilkynningin að Skagfirðingum. „Skagafjörður er afskaplega þétt samfélag þegar á reynir og okkur langar að fá sem flesta hér til að taka þátt, en að sjálfsögðu eru allir án landinu velkomnir. En við töldum að Skagafjörður væri helsti staðurinn til að fá sem flesta til að taka þátt,“ segir Helena.

Sjá Facebook-viðburðinn Látum Skagafjörðinn lýsa fyrir Erlu Björk