Héraðssaksóknari hefur gefið út ákæru á hendur Ingva Hrafni Tómassyni fyrir „sérstaklega hættulega líkamsárás“ á veitingastaðnum Sushi Social við Þingholtsstræti í apríl á þessu ári.

Er Ingva gefið að sök í ákærunni að hafa veist að fórnarlambi sínu með hníf þannig að hann hlaut fimm skurði á líkama sinn, einn við vinstri öxl og fjóra á vinstri handlegg. Segir í ákærunni að skurðirnir hafi verið 2,5 – 5 sentimetra langir og tveir þeirra náð niður í vöðva.

Brotaþoli krefst þriggja milljóna bótagreiðslu úr hendi Ingva Hrafns. Saksóknari krefst þess að Ingvi verði dæmdur til refsingar og til greiðslu alls sakarkostnaðar.

Árásin náðist á myndband

DV sagði frá því í apríl á þessu ári að harkaleg slagsmál hefðu brotist út á Sushi Social og birti með fréttinni myndband sem aðrir gestir veitingastaðarins tóku af átökunum. Strax varð ljóst að eitthvað mikið hafði gengið á á milli mannanna, en á myndbandinu má sjá árásarmanninn sveifla því sem virðist vera hnífur í átt að öðrum manni.

Sjá nánar: Harkaleg slagsmál á Sushi Social í gær

Starfsmaður á veitingastaðnum sagði í samtali við DV að árásin hefði tekið fljótt af og að lögregla hafi verið fljót á vettvang. „Þetta var bara mjög fljótt að gerast, maður sá varla hvað var í gangi. Þetta byrjaði og endaði áður en maður vissi af því og svo var lögreglan bara mætt,“ hafði DV eftir starfsmanninum í apríl.

Gekk laus fram að atvikinu í Borgartúni

Ingvi Hrafn var handtekinn skömmu eftir árásina en ekki var farið fram á gæsluvarðhald yfir honum. Aðeins rúmum tveimur mánuðum síðar var Ingvi aftur handtekinn fyrir að hafa veifað hlaðinni skammbyssu í húsakynnum Samhjálpar í Borgartúni og síðar gengið niður Borgartúnið með skammbyssuna í hendi sér þar til hann var handtekinn við gatnamót Sæbrautar.

Sjá nánar: Ingvi Hrafn ákærður fyrir að beina byssu að vegfarendum og lögreglu – „Hamar var uppdreginn, skothylki í hlaupi og önnur 6 í skotgeymi“

Mikill ótti greip um sig vegna athæfis Ingva Hrafns í Borgartúninu þennan dag. Þannig lýsti til dæmis Þráinn Bj. Farestveit, framkvæmdastjóri Verndar áfangaheimilis fyrir fanga, upplifun sinni á þann veg að Ingvi hafi verið verulega ógnandi og að honum hafi liðið eins og hann væri mættur til markvissra aðgerða með byssuna að vopni.

Sjá nánar: Sá sem mundaði hlaðna skammbyssu í Samhjálp réðst einnig á mann með hnífi á Sushi Social í apríl

Langur sakaferill að baki

Ingvi Hrafn var fyrir um hálfum mánuði dæmdur í þriggja ára fangelsi fyrir ýmis brot, framin við skrifstofu Samhjálpar í júní. Sakaferill Ingva teygir sig þó lengra aftur í tímann. Hefur hann meðal annars áður verið dæmdur fyrir innbrot, þjófnað, ýmis fíkniefnalagabrot og umferðarlagabrot.

Mál héraðssaksóknara gegn Ingva verður þingfest 15. nóvember næstkomandi í Héraðsdómi Reykjavíkur.