Atvinnuvega- og nýsköpunarráðuneytið hefur staðfest þann úrskurð Matvælastofnunar að banna notkun íslensks hrossaþaramjöls í þurrfóður fyrir sæeyru en mjölið var 10% af innihaldsefnum fóðursins. Ástæðan var sú að í hrossaþaramjölinu var arseninnihald of hátt, en arsen er óæskilegt efni. Þetta kemur fram í frétt á vef MAST.

Stofnunin bannaði ræktanda sæeyrna, sem eru ein tegund sæsnigla, að nota slík mjöl í fóður í mars 2020. Ræktandinn kærði ákvörðun Matvælastofnunar til atvinnuvega- og nýsköpunarráðuneytis og benti á að arsenið þynntist út við framleiðslu fóðursins þannig að arsenið væri innan marka í fullbúnu fóðri.

Þá benti  kærandi einnig á að fóðureftirlit Matvælastofnunar tæki einungis til fóðurs ætlað búfé en sæsnilgarnir væru ekki búfé í hefðbundnum skilningi þess orðs.  Enn fremur lægi fyrir að fyrirtæki í öðrum Evrópulöndum notuðu ferskan hrossaþara sem fóður fyrir sæeyru sem þau fyrirtæki rækta.

Matvælastofnun benti hins vegar á að samkvæmt gildandi reglugerðum væri bannað að þynna út óæskileg efni í fóðri, í þessu tilviki arsen, með öðrum fóðurefnum þannig að lokastyrkur yrði innan við leyfilegt hámark.  Sama bann við þynningu gilti um matvæli.

Stofnunin benti enn fremur á að kærandi skilgreindi búfé of þröngt.  Opinbert eftirlit þyrfti að hafa með fóðri allra dýra sem nýtt væru til manneldis.  Neytendur dýraafurða eru með óbeinum hætti að neyta þess fóðurs sem dýrin eru alin á og öll slík dýr væru því í raun búfé.  Varðandi erlend fyrirtæki þá hefðu ekki verið lögð fram nein gögn sem sýndu fram á arsenmagn í þeim hrossaþara sem þau fyrirtæki notuðust við. Magn af arseni í þara getur verið mismunandi og sums staðar innan marka.  Til að mynda skiptir máli hve mengað umhverfið er þar sem þarinn er tekinn upp.