„Í öllu okkar byrjendastarfi leggjum við áherslu á að taka vel á móti bæði börnum og foreldrum þeirra. Foreldranir þurfa að sjá að íþróttahúsið er öruggur staður og að við hugsum vel um barnið þeirra áður en það byrjar að æfa,“ segir Sarah Smiley, íshokkíþjálfari hjá Skautafélagi Akureyrar.
Skautafélagið er á meðal fjögurra félaga sem hlutu styrk Íþrótta- og Olympíusambands Íslands (ÍSÍ) og Ungmennafélags Íslands (UMFÍ) vegna verkefna sem hafa það að markmiði að hvetja börn og ungmenni af erlendum uppruna og fjölskyldur þeirra til þátttöku í skipulögðu íþróttastarfi. Styrkur til hvers félags nemur 250 þúsund krónum og á verkefnið að vara fram á næsta vor.
Dans og sund
Hin félögin sem hlutu styrk eru Dansfélagið Bíldshöfða fyrir aukna danskennslu barna og ungmenna af erlendum uppruna í samstarfi við frístundaheimili í efra Breiðholti, Héraðssamband Vestfirðinga (HSV) fyrir kynningu á starfsemi félagsins á vordögum grunnskóla með aðstoð túlka, þýðingu á stundatöflum og tékklistum fyrir foreldra barna af erlendum uppruna og sunddeild KR ætlar að bjóða upp á sérstakt sundnámskeið.
Talið er að um 10% íbúa á Íslandi séu innflytjendur en samanlagt er fyrsta og önnur kynslóð innflytjenda rúmlega 12% allra þeirra sem búa á Íslandi. Samkvæmt niðurstöðum rannsóknar sem Rannsóknir og greining lagði fyrir alla nemendur í 8. – 10. bekk á Íslandi árið 2016 og síðar stunda rúmur helmingur barna og ungmenna nær aldrei íþróttir þar sem engin íslenska er töluð á heimilinu og stunda tæpur helmingur barna og ungmenna nær aldrei íþróttir þar sem íslenska er töluð ásamt öðru tungumáli.
Börn tala til barna
Skautafélagið fékk styrkinn til að búa til myndbrot fyrir samfélagsmiðla þar sem iðkendur félagsins af erlendum uppruna hvetja önnur börn af erlendum uppruna á eigin tungumáli til þátttöku í íþróttum. Jafnframt er stefnt á að þýða heimasíðu www.sasport.is á önnur tungumál og auglýsinga bæklinginn Vertu með, sem UMFÍ og ÍSÍ hafa gefið út á nokkrum tungumálum.
Um 160 iðkendur hjá Skautafélaginu eru undir 18 ára aldri. Flestir eru iðkendurnir á þeim aldri frá Íslandi en fjölmargir eru frá öðrum löndum á borð við Belgíu, Grikklandi, Lettlandi, Litháen, Póllandi, Kanada, Danmörku og Portúgal.
Sarah segist ekki geta svarað því fullkomlega hvers vegna svona mörg börn sem eiga erlenda forelda stunda skautaíþróttir á Akureyri. Hún segir einhverja foreldra barnanna þekkja og börnin kannast hvert við annað.
„Þegar krakkarnir og foreldrar þeirra sjá hvað starfið er fjölbreytt hjá okkur þá koma þau og byrja að æfa,“ segir Sarah, sem sjálf er frá Kanada en hefur verið búsett hér á Íslandi frá árinu 2006.
