Fjórða valdið, hlaðvarpsþáttur Fjölmiðlanefndar um fjölmiðla er ekki skráður á lista yfir skráða fjölmiðla hjá fjölmiðlanefnd. Í vikunni sektaði þessi sama nefnd, Fjölmiðlanefnd, hlaðvarpsþáttinn Dr. Football um hálfa milljón þáttinn fyrir að hafa auglýst áfengi í þættinum og fyrir að hafa ekki svarað erindum nefndarinnar um að skrá fjölmiðilinn Dr. Football hjá Fjölmiðlanefnd.
Þegar nefndin fékk engin svör hjá Hjörvari Hafliðasyni, forsvarsmanni Dr. Football hlaðvarpsins, fór hún á þá leið að senda honum ábyrgðarbréf heim til hans þar sem svara var krafist og því hótað að nefndin myndi taka málið til afgreiðslu án hans aðkomu. Engin svör bárust og svo fór að lokum að Hjörvari var sent bréf með stefnuvætti, með sömu hótun. Skemmst er frá því að segja, að nefndin stóð við þá hótun.
Í úrskurði nefndarinnar er það rakið hvernig nefndin kemst að þeirri niðurstöðu að hlaðvarp Hjörvars sé fjölmiðill. Vísar nefndin þar m.a. til orða Hjörvars um að Dr. Football sé stærsti fjölmiðillinn í Kópavogi, og telur það vera viðurkenningu á stöðu hlaðvarpsins sem fjölmiðill. Var þessu síðar mótmælt af fulltrúa Dr. Football.
Þá sagði lögmaður Dr. Football, Heiðrún Lind Marteinsdóttir, sem síðar tók slaginn við Fjölmiðlanefnd fyrir hönd Dr. Football að skilgreiningin á fjölmiðli sem Fjölmiðlanefnd styddist við væri „úr hófi víðtæk.“ Samkvæmt henni eru allir þeir sem miðla efni með reglubundnum hætti til almennings, fjölmiðlar. Sagði í svari fótboltahlaðvarpsins að samkvæmt þeirri skilgreiningu væri miðlun Lindu Ben á uppskriftum og lífstílstengdu efni á Instagram, fjölmiðill. Sömu sögu væri þá að segja af þeim Íslendingum sem miðla erótísku efni á Only Fans.
Meintur tvískinnungur og sinnuleysi Fjölmiðlanefndar varðandi sitt eigið Podcast hefur raunar áður vakið athygli, og það einnig meðal fótboltaáhugamanna. Í júní í fyrra kvartaði framkvæmdastjóri fótboltavefsins fotbolti.net, Hafliði Breiðfjörð, til Umboðsmanns Alþingis vegna útgerðar Fjölmiðlanefndar á eigin hlaðvarpi sem það skráði svo ekki á sína eigin skrá yfir fjölmiðla.
„Með þessu er nefndin komin í samkeppni um efni við fjölmiðla sem hún á að veita eftirlit og þar með komin langt út fyrir sitt hlutverk,“ sagði meðal annars í kvörtun Hafliða, framkvæmdastjóra vefsins fotbolti.net. Þá sagði Hafliði jafnframt nefndina ekki hafa sinnt sínum skyldum að skrá fjölmiðil sinn hjá Fjölmiðlanefnd. „Ef nefndin hefði farið eftir eigin skilaboðum hvað þetta varðar þá hefði hún sett fordæmi og verið fyrsta hlaðvarpið á skrá hjá Fjölmiðlanefnd.“
Hjörvar Hafliðason, forsprakki Dr. Football, hefur nú skráð sitt hlaðvarp á skrá Fjölmiðlanefndar yfir fjölmiðla í landinu. Það hefur Fjölmiðlanefnd hins vegar ekki enn gert með eigið hlaðvarp.
