Fréttablaðið skýrir frá þessu. Fram kemur að tillaga hafi verið lögð fram um að afnema þessar greiðslur. Á móti var lögð fram tillaga um að vísa málinu frá en hún var felld.
„Við getum ekki verið í einhverju viðskiptasambandi við guð og það á ekki að vera í samhengi heilags skírnarsakramentis,“ sagði séra Gunnlaugur Garðarsson í gær þegar tillagan um að afnema gjöld vegna prestsþjónustu þjóðkirkjunnar í áföngum.
Frávísunartillaga var lögð fram og sagði séra Þuríður Björg Wiium Árnadóttir, sem var einn flutningsmanna hennar, að kirkjuþing hefði samþykkt að kjaranefnd kirkjunnar færi með samningsumboð hennar við Prestafélag Íslands. Hún sagði að flutningsmenn frávísunartillögunnar teldu að aukaverkin féllu undir þetta umboð og til væri lögfræðiálit um það.
Séra Gunnlaugur sagði að málið væri ekki nýtt af nálinni. Hann hafi fengið samþykkta tillögu á aðalfundi Prestafélags Íslands um að stjórnin myndi í samráði við biskup Íslands taka á málinu og fella niður alla gjaldtöku í samhengi skírnar. „Og ég get líka upplýst ykkur um það að sá ofríkisandi ríkti í stjórninni að hún gerði ekkert með þessa aðalfundarsamþykkt allt til þessa dags. Ótrúlegustu menn stóðu upp í harkalegri vörn fyrir pyngju sinni,“ sagði hann.
Steindór Haraldsson, útfararstjóri og samstarfsmaður presta um áratugaskeið, sagði frávísunartillöguna með ólíkindum. „Þessi frávísunartillaga er ein ljótasta tillaga sem ég hef séð á kirkjuþingi síðan ég kom hérna inn 2010. Það er svo grímulaust farið að því að verja eigin fjárhagshagsmuni. Að níu af tólf prestum á kirkjuþingi hafi ekki meiri sjálfsvirðingu en þetta, það kemur mér á óvart,“ sagði hann.
Hjalti Hugason, prófessor í kirkjusögu við Háskóla Íslands, sagði frávísunartillöguna vera með ólíkindum. „Það er raunverulega til nýyrði í íslensku máli sem tekur á svona málflutningi – sem er séra-hagsmunagæsla,“ sagði hann.
