Maður með boga og örvar var handtekinn á Selfossi í morgun. Lögreglu barst tilkynning um manninn klukkan 04:18 um nóttina, en þá var hann á gangi um Tryggvatorg á Selfossi. Þetta kemur fram í tilkynningu lögreglu.
Lögregla fór á vettvang og fann manninn innan skamms. Hún fylgdist með ferðum hans um nokkurra stund, án hans vitneskju, og ákvað að lokum að handtaka hann á Árvegi til móts við Hörðuvelli.
Fram kemur í tilkynningunni að handtakan hafi farið fram án mótþróa. Þegar lögreglan hafi beðið hann um að leggja niður vopn sín hafi hann gert það samstundis.
Hann var færður í fangageymslu á Selfossi og bíður þess nú að verða yfirheyrður um ferðir sínar og fyrirætlanir. Fram kemur að yfirheyrslan muni fara fram um leið og ástand mannsins leyfir.
Mikill viðbúnaður var að hálfu lögreglu vegna atviksins, sérsveit ríkislögreglustjóra var sett í viðbragðsstöðu, sem og sjúkraflutningamenn á Selfossi. Það er í samræmi við verklagsreglur sem varða það þegar fengist er við vopnaða menn.
Í yfirlýsingu lögreglu segir að frekari upplýsingar um málið verði ekki gefnar að sinni en málið sé til rannsóknar hjá rannsóknardeild lögreglunnar á Suðurlandi.
