„Ef við horfum á faraldurinn hér á Íslandi þá hafa núna um og yfir átta hundruð börn smitast af Covid og ekkert þeirra veikst alvarlega,“ hefur Fréttablaðið eftir Valtý í umfjöllun um málið í dag. Hann benti jafnframt á að börnin fái mikla eftirfylgni á Covidgöngudeild Barnaspítala Hringsins. Hann sagði að COVID-sýking virðist hafa lítil áhrif á ungabörn en dæmi eru erlendis frá um börn sem smitast við fæðingu eða jafnvel í móðurkviði og vegnar vel eftir sýkingu.
Bóluefni gegn COVID-19 hafa ekki fengið markaðsleyfi fyrir börn yngri en tólf ára en einhver lyfjafyrirtæki eru byrjuð að sækjast eftir slíkum leyfum og vinna nú að rannsóknum á bóluefnum fyrir börn niður í tveggja ára aldur og jafnvel yngri. „Persónulega og út frá þeim gögnum sem við höfum finnst mér ekkert liggja á að bólusetja yngri börn,“ ef haft eftir Valtý sem sagði að hins vegar væri gagnlegt að bólusetja öll börn til að hjálpa til við að halda faraldrinum fjarri.
Fram að þessu hefur ekkert komið fram sem bendir til að bóluefni virki illa á börn eða valdi aukaverkunum sem ekki hafa sést hjá fullorðnum. Valtýr sagðist þó telja betra að bíða í nokkra mánuði eftir frekari gögnum. „Ef við ætlum að bólusetja heilbrigð börn þá verður þetta að vera öruggt,“ sagði hann.
