Fréttablaðið skýrir frá þessu í dag. Fram kemur að söluaðilar geti sjálfir ákveðið hvaða gjald þeir rukka fyrir umbúðirnar. Gró Einarsdóttir, sérfræðingur hjá Umhverfisstofnun, sagði að hvert fyrirtæki geti ákveðið það gjald sjálft. „Það er ekkert verð tiltekið í lögunum þannig að veitingastaðurinn getur ákveðið hvað það eigi að kosta. Það verður spennandi að sjá hvað sölustaðir ákveða að gera. Þau geta ákveðið að setja verð sem er sambærilegt annarri verðlagningu ef þau eru með innkaupakostnað sem þau leggja ofan á. Svo geta þau ákveðið að leggja hátt gjald og þannig reynt að fæla viðskiptavini frá því að nota einnota mál. Sem er jákvætt fyrir umhverfið en neytendur verða kannski ekki hrifnir. Sölustaðir geta líka sett undirverð ef þau vilja ekki að það fæli frá og svo geta staðir að lokum nýtt tækifærið til að hækka verð á vörum sem þeir eru að selja,“ er haft eftir henni.
Hún sagði einnig að mikilvægt sé að fyrirtæki uppfæri verðskrár sínar og kassakerfi þannig að neytendur geti séð hvað varan kostar ef fólk kemur með eigin ílát, ef boðið er upp á þann möguleika, og hvað hún kostar ef hún er afgreidd í plastíláti. „Mér finnst mikilvægt að veitingastaðir viti af þessu. Það þarf að undirbúa kassakerfið og vera með möguleikann þar. Svo þarf þetta auðvitað að koma fram á kassakvittunum auk þess sem það þarf mögulega í einhverjum tilfellum að breyta matseðlum og verðskrá,“ sagði hún.
Hún sagði einnig að það skipti ekki máli hversu lítið ílátið sé, það þurfi að rukka fyrir það ef það er úr plasti. Hún nefndi sem dæmi kokteilsósu sem er afgreidd í pappadollu sem er með plastloki. Þá þarf að greiða fyrir lokið. Hún sagði aðalatriðið vera að neytendur hugsi notkun sína á einnota ílátum upp á nýtt og komi með sín eigin þar sem það er í boði.
