Nú fyrir hádegi í dag verður tekið fyrir mál Akureyrarkirkju gegn karlmanni, en kirkjan gerir þar kröfu um að hann greiði kirkjunni 20 milljónir í skaðabætur vegna skemmdarverka sem hann á að hafa unnið á kirkjunni í janúar 2017. Maðurinn var metinn ósakhæfur í sakamáli um sama atvik.

Skemmdarverk voru unnin á fjórum kirkjum þann 4. janúar og var maðurinn handtekinn degi síðar á Akureyri, grunaður um verkið. Skemmdarverkin vöktu mikla athygli og var sagt frá þeim í fjölmiðlum. „God Satan, Good Bad, Hegelian Dialectic,“ „God=Dictator,“ „Religion=Slavery,“ „Symbolism=Mass Control,“  og „God is a Cunt,“ var meðal þess sem skrifað hafði verið utan á kirkjur bæjarins með úðabrúsa.

Í frétt RUV frá því 2017 er haft eftir Ólafi Rúnari Ólafssyni, formanni sóknarnefndar Akureyrarkirkju, að illa hafi gengið að ná öllum ummerkjum af klæðningu kirkjunnar. Var þar jafnframt haft eftir honum að það gæti farið svo að fjarlægja þyrfti skemmdu klæðninguna af kirkjunni og setja nýja. Klæðning Akureyrarkirkju er friðuð.

Ákæra var gefin út á sínum tíma, en maðurinn þá metinn ósakhæfur. Lauk því þeim málaferlum án dóms. Skipaður verjandi mannsins í sakamálinu staðfesti í samtali við DV að maðurinn hafi verið metinn ósakhæfur og málinu lokið þannig, en vildi að öðru leyti ekki tjá sig um málið.

Samkvæmt heimildum DV hefur maðurinn átt við andleg veikindi að stríða og var metinn ósakhæfur vegna þeirra. Þá missti maðurinn foreldra sína og bróður í hræðilegu flugslysi við Múlakot í Fljótshlíð sumarið 2019.

Tug milljóna krafa

Í kjölfar þess að maðurinn var metinn ósakhæfur féllu þrjár kirkjur frá kröfum sínum í málinu. Akureyrarkirkja hins vegar höfðaði einkamál sem nú er til meðferðar í dómskerfinu, og verður sem fyrr segir tekið fyrir í Héraðsdómi Norðurlands Eystra í dag, fyrir hádegi.

Heimildir DV herma að Akureyrarkirkja krefjist þess að maðurinn greiði kirkjunni 20 milljónir í bætur.

Lögmaður Akureyrarkirkju í einkamálinu er svo áðurnefndur Ólafur Rúnar Ólafsson, sem enn er formaður sóknarnefndar kirkjunnar. DV ráðfærði sig við lögfræðinga sem sögðu það í besta falli óheppilegt að formaður sóknarnefndar sem tekur ákvörðun um að höfða málið sé jafnframt starfandi lögmaður kirkjunnar í málinu, sér í lagi í ljósi þess að um Þjóðkirkjuna sé að ræða. Í versta falli gæti verið um brot á siðareglum lögmanna að ræða.

Í 8. gr. siðareglna segir: „Lögmanni ber að forðast að samkenna sig skjólstæðingi sínum og hefur kröfu til að vera ekki samkenndur þeim sjónarmiðum og hagsmunum, sem hann gætir fyrir skjólstæðing sinn.“

Lögmaður Akureyrarkirkju í málinu er ekki aðeins formaður sóknarnefndar, heldur kom fram fyrir hönd kirkjunnar í fjölmiðlum í kjölfar skemmdarverkanna, tók ákvörðun um að kæra málið til lögreglu, kom fram fyrir hönd kirkjunnar við rekstur sakamálsins, og var aðili að ákvörðun um að höfða einkamálið.

Ekki náðist í Ólaf Rúnar við vinnslu fréttarinnar og er spurningum DV, listaðar hér að neðan, enn ósvarað:

1. Er eðlilegt að kirkjan geri 20 milljóna bótakröfu vegna aðgerða ósakhæfs manns?
2. Þykir þér eðlilegt að formaður sóknarnefndar starfi sem lögmaður kirkjunnar í svona máli?
3. Var ráðning þín í þetta verk [sem lögmaður] lögð fyrir og samþykkt af sóknarnefnd í heild?

DV tók jafnframt Svavar Alfreð Jónsson, sóknarprest á tal en hann vildi lítið tjá sig um málið. Hann staðfesti þó að prestar kirkjunnar voru hafðir með í ráðum þegar tekin var ákvörðun um að leggja af stað í málareksturinn. Aðspurður hvort það teldist kristilegt að krefjast 20 milljóna úr hendi manns sem metinn var ósakhæfur vegna sama atviks, vísaði presturinn á Ólaf Rúnar, formann sóknarnefndar.