21 árs gamall karlmaður hlaut á dögunum þriggja mánaða fangelsisdóm í Héraðsdómi Suðurlands fyrir fjársvik, þjófnað og tuttugu umferðarlagabrot. Kemur fram í dómnum að maðurinn hafi átta sinnum áður verið fundinn sekur um refsiverð brot.

Athygli vekur að brotin eru framin víða um land og teygja sig aftur til haustsins 2019 þegar hann, á þriggja daga tímabili, sveik samtals 140 þúsund krónur úr fólki á Internetinu með því að telja þeim trú um að hann hefði iPhone xs MAX síma til sölu á Internetinu. Þannig blekkti hann fólk til þess að millifæra fyrst 100 þúsund krónur, og svo 40 þúsund krónur inn á reikning hans en afhenti aldrei umrædda síma.

Þá mun hann hafa leikið sama leik á Internetinu í desember það sama ár þegar hann seldi bifreið án þess að afhenda hana. Náði hann þannig að svíkja 100 þúsund krónur út úr manninum.

Enn fremur var maðurinn fundinn sekur um að hafa stolið kerru í Varmahlíð í Skagafirði í eigu Karlakórsins Heimis og síðar þann sama morgun að hafa stolið torfæruhjóli úr skemmu við sveitabæ í Skagafirði, ekið því að kerrunni og ekið svo á brott með allt heila klabbið.

Til viðbótar við ofangreind brot er maðurinn í þessum sama dómi sakfelldur fyrir 20 umferðarlagabrot framin á nokkurra mánaða tímabili vítt og breitt um landið. Flest þeirra varða hraðakstur og/eða akstur án þess að hafa til þess gild ökuréttindi.

Maðurinn játaði sök að öllu leiti nema hvað eitt umferðarlagabrot varðaði, en var við meðferð málsins fundinn sekur um það líka. Samtals voru ákæruliðirnir því 23 sem hann var sakfelldur fyrir.

Í ljósi sakaferils mannsins og ítrekaðra brota þótti fangelsisvist í þrjá mánuði hæfileg refsing. Að auki þarf maðurinn að greiða lögmanni sínum 900 þúsund krónur í málsvarnarlaun auk aksturskostnað að fjárhæð 77 þúsund króna. Þá er honum gert að greiða rúmlega tveggja milljóna sekt innan fjögurra vikna, en sæta ella fangelsi í tvo mánuði til viðbótar.

Að lokum var hann sviptur ökurétti í fjóra mánuði og sviptur rétti til að öðlast ökuskírteini í sex ár og átta mánuði.